Брюссель аэропортидаги терактнинг учинчи иштирокчиси мустақил журналист бўлиб чиқди

Бельгия полицияси Брюссель аэропортидаги терактнинг учинчи иштирокчисини қўлга олди. Ҳужумдан бир неча соат ўтиб, чоп этилган видеода кўзга ташланган «шляпали эркак» мустақил журналист Файсал Шеффу бўлиб чиқди, деб хабар беради «РБК».

Аввалроқ Бельгиянинг Derniere Heure газетаси Брюссель аэропортидаги портлашларни амалга оширган деб тахмин қилинаётган шахсларнинг фотосуратини эълон қилган эди. Аммо кейинроқ фотосуратда ака-ука Бакравийлар ёнида кетаётгани қайд этилган шахс портлашларга алоқадорликда гумон қилинаётган Нажим Лаашравий бўлиб чиқмагани айтилган эди.

25 март, жума куни Файсал Шеффу полиция томонидан қўлга олинди, 26 март куни эса у терактлар уюштириш, қотиллик ва қотилликка уринишда айбланди.

Бельгиянинг Le Soir газетаси берган маълумотга кўра, Шеффу ҳамда унинг икки шеригини аэропортга олиб келган таксичининг кўрсатмалари асосида унинг шахсини аниқлашга муваффақ бўлинган.

Гумондорнинг уйидан қуроллар ёки портловчи моддалар топилмаган.

Файсал мустақил журналист бўлиб, хусусан, Journal du Musulman нашрида мақолалар чиқариб борган.

Эслатиб ўтамиз, олдинроқ Брюссель аэропортидаги бомбани ака-ука Бакравийлар портлатгани хабар қилинганди.

Полиция маълумотларига кўра, аэропортдаги портлашга жами уч киши алоқадор бўлган, улардан икки нафари ҳалок бўлган, учинчиси аэровокзал биносидан қочиб қолган.

22 март, сешанба куни Бельгия пойтахтининг аэропорти ва метросида қатор портлашлар содир этилди. Натижада, сўнгги маълумотларга кўра, 36 киши ҳалок бўлди, 230 киши жароҳат олди.