Ўзбекистонда хизмат кўрсатган артист Оғабек Собиров 2016 йилда концерт дастурини тақдим этишни режалаштирмоқда. Таниқли хонанданинг режалари билан танишиш мақсадида журналист Феруз Муҳаммад Оғабек Собиров билан суҳбат уюштирди.
— Шу вақтгача концертингиз ҳақидаги хабарларга, баннерларига кўзимиз тушмади. Бу йил концерт дастури тақдим этиш ниятингиз борми?— Насиб қилса, бу йил мухлислар эътиборига концерт дастуримизни ҳавола қилмоқчимиз. Дастурни «Истиқлол» санъат саройида эмас, «Туркистон»нинг ёзги залида ўтказишни ўйлаб қўйдик. Концертнинг санаси ҳали аниқ эмас, тахминан июнь ойининг бошларида ўтказилиши кўзда тутилган.
— Назаримда, Сиз учун «Туркистон» санъат саройи кичиклик қилади?— Тошкентдаги илк концертимни 1998—1999 йилларда айнан «Туркистон» да берганман. Шу концерт дастурининг файзи туфайли, мухлисларимизнинг меҳри-муҳаббати сабаб, қатор йиллар «Истиқлол» санъат саройида жонли ижрода 7—10 кунлаб концертлар ўтказдик. Янги концерт дастурини эса очиқ осмон остида, худди чет элдаги концерт дастурлари каби ўйин-кулги ва мухлислар билан жўр бўлиб, кўтаринки кайфиятда ўтказмоқчимиз. «Туркистон»даги бу дастур менинг яккахон концертим эмас, балки «Лазги» ансамблининг бир йиллик ҳисобот дастури бўлади. «Лазги» ансамбли ёш бўлишига қарамасдан, бир йилдан ортиқроқ вақт мобайнида дастурга катта тайёргарлик кўрди.
— Сўнгги концертингизда ижодий анъанангиз бузилди: йиллар мобайнида жонли куйлаб келган Оғабек Собиров бу сафар фонограммада куйлади. Бунга саломатлиги билан билан боғлиқ муаммолар сабаб бўлди, деган гаплар тарқалди.— Ҳа, саломатлигим билан боғлиқ муаммолар туфайли дастурни фонограмма орқали ўтказганим рост, аммо бу ҳақда гапириб, мухлисларимни ваҳимага солишни хоҳламайман. Насиб қилса, ҳали узоқ йиллар мухлисларимизни жонли куй ва қўшиқлар орқали хушнуд қилишда давом этамиз.
— «Истиқлол» санъат саройида концерт бераётган аксарият санъаткорлар жонли куйламаётгани сабабини сарой техникаси талабга жавоб бермаслиги билан изоҳламоқда. Сиз неча йиллаб бу саройда жонли ижрода куйлагансиз, бошқа хонандаларнинг техникани айблаши асослими?— Бир томондан асосли, бошқа томондан асоссиз. Асосли томони шундаки, ҳақиқатан ҳам санъат саройларимизда мавжуд техникани тилини тушуниб, ўз ўрнида ишлата оладиган техник ходимлар жуда кам. Борлари ҳам тадбирлар кўплиги боис қўли қўлига тегмайди. Биз «Истиқлол»да жонли концерт бериш учун тайёргарликни икки ой олдиндан бошлардик. Тошкентдаги энг маҳоратли созандалар билан бир ярим ой Хоразмда тайёргарлик кўриб, концертга 15 кун қолганида тайёргарликни пойтахтда давом эттирар эдик. Техникани баҳона қилаётган санъаткорларнинг аксарияти, балки, ўз кучига ишонмас. Катта меҳнат, моддий харажатдан қочмаса, «Истиқлол»да бемалол жонли концерт қўйиш мумкин.
Изоҳ (0)