Ўзбекистонлик теннисчи Шаробиддин Абзалов Намангандаги турнирда иштирокини ғалаба билан бошлади

Наманган шаҳридаги «Дўстлик» теннис кортларида ўсмирлар ўртасидаги Namangan ITF Juniors турнирининг асосий тўр баҳслари бошланди, деб хабар беради «Оламспорт».

Ушбу мусобақада ўзбекистонлик теннисчиларидан ташқари Буюк Британия, Франция, Беларусь, Россия, Ҳиндистон каби ўнга яқин давлатлардан истеъдодли теннисчилар иштирок этяпти.

Наманган турнирида иккинчи рақам остида таснифланган ўзбекистонлик Шаробиддин Абзалов илк даврада британиялик Луис Нюманга қарши кортга чиқди ва 6:0, 6:0 ҳисобида ғалаба қозонди. Турнирда биринчи ракетка сифатида қайд этилган латвиялик Рудольф Меднис қозоғистонлик Бейбит Жукаевдан икки сетда ҳам бир хил – 6:1, 6:1 ҳисобида устун келди.

Ўзбекистонлик теннисчилардан Азамат Луқмонов британиялик Жеймс Дэвисга 0:6, 2:6, Сергей Фомин эса ҳиндистонлик Адил Калянпурга 6:7, 6:7 ҳисобида имкониятни бой бериб қўйди.

Бугун ўзбекистонлик теннисчилардан Амал Султанбеков, Азизхон Турғунов ва Данис Байбеков кортга чиқади.