Chustiy’s Cuisine ва Tez Food маъмурияти ташаббуси билан 20 март куни соат 18:00 да Samarqand Darvoza гипермаркетида Наврўз умумхалқ байрами муносабати билан «Қарабтеп» (яна бир номи — «ланка») халқ ўйини бўйича Ўзбекистон очиқ чемпионати ўтказилади.
Мазкур тадбир унутилиб бораётган миллий халқ ўйинларини қайта тиклаш, соғлом турмуш тарзини тарғиб қилиш мақсадида ташкил қилинмоқда.
«Қарабтеп» халқ ўйини бир неча асрлар мобайнида халқ сайилларида, Наврўз тантаналарида мунтазам равишда ўйнаб келинган. «Қарабтеп» ҳақида илк марта Ибн Синонинг «Тиб қонунлари» китобида маълумотлар учраши қайд этилган.
Мутахассислар хулосасига кўра, ушбу халқ ўйини инсон саломатлигига кони фойда. Хусусан, умуртқа поғонаси, кўз, юрак, қорин аъзолари, оёқ мушаклари, нафас йўллари фаолиятини, қон айланишини яхшилайди.
Сиз ҳам яхшилаб эсланг, болалигингизда қўйнинг бир парча жунли терисига металл парчаси (асосан қўрғошин) маҳкам боғланган тепкини дўстларингиз билан мириқиб тепар эдингиз-ку, тўғрими?
Ўша беғубор ва завқли даврларни ёдга олмоқчи бўлсангиз ва яна бир бор мириқиб «Қарабтеп» ўйнамоқчи бўлсангиз, унда Сизни 20 март куни соат 18:00 да Ўзбекистон очиқ чемпионатида кутиб қоламиз.
Чемпионатда энг яхши дея эътироф этилган уч нафар иштирокчига Chustiy’s Cuisine ва Tez Food маъмуриятидан махсус пуллик сертификат топширилади. Шунингдек, «Соғлом она ва бола йили» муносабати билан «Энг яхши ёш иштирокчи» махсус номинацияси ҳам жорий этилган.
Чемпионат эркин усулда ўтказилади ва ким тепкини ерга туширмасдан энг кўп тепса, ўша иштирокчи ғолиб бўлади. Ҳар бир иштирокчига иккитадан имконият берилади.
Чемпионатда қатнашиш учун Facebook ижтимоий тармоғи орқали иштирокчи сифатида олдиндан рўйхатдан ўтиш лозим.
«Қарабтеп» халқ ўйини бўйича Ўзбекистон очиқ чемпионатининг ахборот ҳамкорлари — «Дарё» интернет-нашри, «Xushnudbek.uz» сайти ҳамда Facebook ижтимоий тармоғидаги «Maslahat.uz» гуруҳи.
Изоҳ (0)