Эрон бозорни барқарорлаштиришга қаратилган йирик ишлаб чиқарувчилар билан келишув доирасида нефть қазиб чиқаришни кўпайтириши мумкин. Бу ҳақда Россия энергетика вазири Александр Новак Эрон нефть вазири Бижон Номдор Зангане билан музокаралари якунидан сўнг маълум қилди, дея хабар беради «РБК».
«Йирик нефть ишлаб чиқарувчилар бир-бири билан ўзаро келишувга эришиши керак. Бироқ Эрон санкциялар амалда бўлган пайтда қазиб чиқаришни камайтиргани сабабли биз унинг дунё бозоридаги улушини тиклашга бўлган интилишини тўлиқ тушуниб турибмиз», — дея таъкидлаган Новак.
Шу йил февраль ойида Россия ва ОПЕКга аъзо уч давлат —Саудия Арабистони, Венесуэла ва Қатар, агар бошқа йирик экспортчилар ҳам бунга қўшилса, нефть ишлаб чиқаришни январь ойи ҳажмида музлатиш тўғрисида келишувга эришганди. Кейинчалик Новак бу келишувни дунёдаги нефть экспортининг 73 фоизи тўғри келадиган 15 мамлакат ҳам қўллаб-қувватлашини билдирди. Бироқ Эрон мазкур битимга қўшилишдан бош тортди ва буни 2016 йил бошида олиб ташланган халқаро санкциялардан сўнг бозорлардаги ўрнини тиклаши лозимлиги билан изоҳлади.
Ҳозирги кунда Эрон кунига 1,4 миллион баррель нефть экспорт қилмоқда ва бу кўрсаткични уч ой давомида 2 миллион баррелга чиқариш ниятида.
Изоҳ (0)