Korzinka.uz супермаркетлар тармоғи Ўзбекистон шаҳарлари бўйлаб ўз филиаллари сонини кўпайтириш бўйича иш олиб боряпти. Бу ҳақда 9 март, чоршанба куни тармоқ раҳбари Зафар Ҳошимов Facebook’даги «Потребитель.уз» гуруҳида хабар қолдирди.
«Ҳозирда Бухоро ва Андижондаги ўз супермаркетларимиз учун мўлжалланган иншоотларни қуриш ва реконструкция қилиш бўйича иш олиб боряпмиз», — деди Зафар Ҳошимов.
«Бугун Наманган ва Фарғонада бўлиб, супермаркетлар қуриш учун таклиф қилинаётган ҳудудлар билан танишдим. Қарши шаҳрида ҳам бизга жой таклиф қилишмоқда», — деб қўшимча қилди Korzinka.uz раҳбари.
Аввалроқ Тошкент шаҳридаги Next ва Vega савдо-кўнгилочар марказларидаги Trend супермаркетлари ўрнини Korzinka.uz тармоғи эгаллаши маълум бўлганди.
Қайд этиш жоиз, 2016 йилдан Тошкентдаги йирик супермаркет тармоқлари Ўзбекистоннинг бошқа ҳудудларида ҳам ўз филиаллари кўпайтиришга фаол киришди. Хусусан, аввалроқ Андижон, Наманган, Қибрай, Шаҳрихон каби шаҳарларда Sunday супермаркетлари очилган эди.
Изоҳ (0)