USM Holdings акциядорлари Алишер Усмонов, Владимир Скоч, Фарҳод Моширий, Иван Таврин ва Иван Стрешинскийлар ҳамкорликда янги инвестицион жамғарма ташкил этди. «РБК» нашрининг маълум қилишича, жамғарманинг капитали 1 миллиард долларни ташкил қилади.
Ҳозирча янги тузилма портфелида 7 та хорижий IT-лойиҳа бор. Жамғарма технологик компанияларга инвестициялар киритади. Улар орасида дунёдаги энг йирик такси агрегатори Uber ҳамда унинг Хитой ва Ҳиндистондаги муқобиллари — Didi Kuaidi ва Ola Cabs, Хитойнинг смартфон ва планшетлар ишлаб чиқарувчи Xiaomi компанияси, шунингдек, Ҳиндистоннинг энг йирик интернет-дўконларидан бири — Flipkart бор.
Айтилишича, жамғарма 2014 йилдаёқ тузиб бўлинган. Шунга қарамай, унинг номи ошкор қилинмаяпти.
Жамғармада инвесторлар улушлари уларнинг USM Holdings’даги улушларига мувофиқ равишда белгиланган. Холдингнинг энг йирик акциядори Алишер Усмонов бўлиб, унга тузилманинг 48 фоизи тегишли. Акцияларнинг 30 фоизи Владимир Скочга, 10 фоизи холдинг директорлар кенгаши раиси Фарҳод Моширийнинг трастига, 3 фоизи «МегаФон» бош директори Иван Тавринга, қолгани эса USM менежменти ва шуъба корхоналарига тегишли.
Маълум бўлишича, инвестицион компания асосан Осиё бозорига қизиқиш билдирмоқда. У иштирок этаётган лойиҳаларнинг аксарияти айнан Осиёдадир.
Изоҳ (0)