Бруклин федерал суди қарорига кўра, АҚШ ҳукумати Apple корпорациясини iPhone ҳимоясини бузишда ёрдам беришга мажбурлаши мумкин эмас. Бу ҳақда, Business Insider хабарномасига таяниб, «Интерфакс» ёзмоқда.
Бунда гап Сан-Бернардинодаги теракт туфайли келиб чиққан можаро ҳақида эмас, балки метамфетамин сотувчиси Жун Фенг ҳодисаси билан боғлиқ. Унинг уйи тинтув қилинганида, у ердан iPhone 5S телефони топилган. Фенг смартфон паролини унутганини айтганидан сўнг, АҚШ наркотикка қарши кураш бошқармаси Федерал қидирув бюросига мурожаат қилиб, телефонни очишда ёрдам сўраган.
Ўз навбатида, ФҚБ судга мурожаат қилиб, ишлаб чиқарувчининг бу борада кўмак беришига эришмоқчи бўлди. Судья Apple ҳукумат талабига кўра ўз маҳсулотларининг ҳимоясини бузиш имкониятларини фош қилишга мажбур эмаслигини белгилаб, даъвони рад қилди.
Нью-Йоркда кўриб чиқилган иш Калифорния суди шуғулланаётган сан-бернардинолик террорчининг iPhone ишига «жуда ўхшаш». Шу сабабли ҳам, Apple вакилларидан бирининг журналистларга маълум қилишича, корпорация Нью-Йоркда кўрилган иш Калифорниядаги ишга ҳам таъсир қилишига умид қилмоқда.
Эслатиб ўтамиз, 16 февраль куни АҚШ суди Apple корпорацияси Федерал қидирув бюроси ходимларига «Сан-Бернардино мергани»нинг телефонини бузиб, ундаги маълумотларни олишда ёрдам бериши лозимлиги ҳақида қарор қабул қилди.
Суд қарорига мувофиқ, корпорация шу пайтга қадар террорчилардан бири Саид Фаруқнинг мобил ускунаси маълумотларига бузиб кира олмаётган ФҚБ ходимларига махсус дастурий таъминот тақдим этиши талаб қилинади. Корпорация раҳбари Тим Кук бунга жавобан суд қарорига расмий эътироз билдирилишини таъкидлаб ўтган эди.
Изоҳ (0)