Ноутбук учун селфи-таёқ ишлаб чиқилди (фото)

Америкалик ихтирочилар Том Гэлл, Жон Юй ва Мойсес MacBook орқали селфи олиш мосламасини ишлаб чиқди, дея хабар бермоқда «Hi-tech.mail.ru».

MacBookselfiestick сайтида ташаббускорлар MacBook учун мўлжалланган селфи-таёқдан фойдаланиб, Нью-Йорк марказида суратга тушаётган кишилар расмларини жойлади. Уларда ўткинчилар узун металл таёққа ўрнатилган ноутбук орқали селфи олаётган кишини кўриб, кулгили юз ифодаси билан ҳайрон бўлиб қараб турганини кўриш мумкин.

Ҳақиқатан ҳам, оғирлиги қарийб бир килограмм MacBook ўрнатилган конструкцияни қўлни чўзган ҳолда ушлаб туриш жуда қийин, бундан ташқари ушбу ҳолатда иккала қўлни ҳам ишлатишга тўғри келади.

Ихтирочилар эса MacBook учун монопод ижодий лойиҳа эканлиги, бундай селфи-таёқларни сотмоқчи эмаслигини билдирди. Лойиҳадан мақсад — селфи (нафақат MacBook’да, балки умуман олганда) қанчалик бемаъни кўринишини кўрсатиб бериш.