Yahoo! Компаниясининг икки собиқ ходими 2009 йилда WhatsApp мессенжерини ишга туширганида, савдода Android-смартфонлар сони жуда камчиликни ташкил этар, жаҳон мобил бозорини эса Nokia ва RIM (кейинчалик номи BlackBerry’га ўзгарди) эгаллаган эди. Шу боис янги хабарлар алмашинуви хизмати асосчилари барча оммавий платформалар билан ишлашга ҳаракат қилди. Бироқ орадан ўтган етти йил ичида мобил бозорида катта ўзгаришлар содир бўлди, деб ёзади «Терабайт».
Эндиликда WhatsApp жамоаси эски ва унча оммалашмаган операцион тизимлар, шу жумладан, BlackBerry ОS (барча талқинлари, жумладан BB10), Nokia С40, Symbian S60, Android 2.1, Android 2.2 ва Windows Phone 7.1 учун ишланмаларни бекор қилишни маъқул топди.
Дастурчиларнинг сўзларига кўра, эски қурилмалар вақт ўтиши билан WhatsApp’да жорий этилаётган янги вазифаларни амалга оширишга имкон бермайди. Масалан, Symbian ва Nokia телефонлари овозли қўнғироқларни қўллаб-қувватламайди.
Шунинг учун ҳам мессенжер келгусида фақатгина учта оммавий операцион тизим (Android, iOS ва Windows Phone) асосидаги смартфонларда ишлайдиган бўлади. Таҳлилчиларнинг маълум қилишича, бугунги кунда мазкур уч операцион тизим смартфонлар бозорининг 99,5 фоизига эгалик қилмоқда.
Ўзгаришлар 2016 йилнинг охирига қадар амалга оширилади. Яқин вақтларда эса WhatsApp видеоқўнғироқларни ишга тушириш арафасида.
Изоҳ (0)