Кеча, 27 февраль оқшомида Тошкентдаги «Ўзбекистон» спорт саройида Бутунжаҳон бокс серияси (WSB)нинг VI мавсумидан ўрин олган навбатдаги жанглар ўтказилди. Унда Uzbek Tigers жамоаси мусобақанинг амалдаги чемпиони Қозоғистоннинг Astana Arlans боксчиларига қарши рингга кўтарилди, деб хабар беради «Оламспорт».
Муросасиз кечган баҳсларда ўзбекистонлик боксчилар рақибларини 4:1 ҳисобида мағлуб этди. -49 килограмм вазн тоифасида рингга кўтарилган Ҳасанбой Дўсматов рақиби Темиртас Жусуповни 3:0 ҳисобида енгди. -56 килограмм вазндаги ўзбекистонлик чарм қўлқоп устаси Абдулҳай Шораҳматов ҳам рақиби Меирболат Тоитовни 3:0 ҳисобида мағлубиятга учратди.
-64 килограмм вазнда рингга чиққан Фазлиддин Мелибоев рақиби Асхат Уалихановни 3:0 ҳисобида таслим этди. -75 килограмм вазндаги Ўзбекистон вакили Хуршид Норматов Мейирим Нурсултановга 0:3 ҳисобида имкониятни бой берган бўлса, -91 килограмм вазндаги Мирзабек Ҳасанов эса Еркин Муҳамеджанни 3:0 ҳисобида доғда қолдирди. Шу тариқа, Uzbek Tigers жамоаси 4:1 ҳисобида ғалаба қозонди.
Эслатиб ўтамиз, 26 февраль, жума куни ўтказилган жангларда Uzbek Tigers жамоаси Пуэрто-Риконинг Puerto Rico Hurricanes боксчиларини 5:0 ҳисобида мағлуб қилганди.
Шунингдек, кеча, 27 февраль куни APB йўналишида ташкил этилган ҳар икки жангда ҳам ўзбекистонлик боксчилар рақибларини мағлуб этишнинг уддасидан чиқди. -81 килограмм вазн тоифасидаги Ўзбекистон вакили Зуҳриддин Маҳкамов руминиялик Александр Мачедонни 3:0, +91 килограмм вазндаги ўзбекистонлик Улуғбек Мубинов эса муросасиз кечган жангда хорватиялик Марин Миндолевични 3:0 ҳисоби билан мағлубиятга учратди.
Изоҳ (0)