Туркия Сурия ҳудудида қуруқликдаги операцияни ўтказиш учун тайёргарлик кўраётгани ҳақидаги гап-сўзлар рад этилди

Туркия Сурия ҳудудида қуруқликдаги операцияни ўтказиш учун тайёргарлик кўраётгани йўқ. Мазкур баёнот, «РБК» хабарига кўра, Туркия президенти матбуот котиби Иброҳим Калин томонидан берилди.

«Биз коалиция доирасида ҳаракат қилишимизни бир неча бор таъкидлаган эдик. Шу муносабат билан, бир томонлама ёки Саудия Арабистони ёки бошқа бир мамлакат билан биргаликда операцияга тайёргарлик кўрилаётгани ҳақида ҳеч қандай гап бўлиши мумкин ҳам эмас», — деди Калин.

Февраль ойи ўрталарида Туркия коалиция бўйича ўз ҳамкорларини Сурия ҳудудида ИШИДга қарши қуруқликдаги операцияларни бошлашга чақираётгани маълум бўлганди. Мазкур ахборотни Reuters агентлигига туркиялик амалдорлардан бири етказган эди. Агентлик манбаси Туркия ҳеч бир ҳаракатни якка ўзи амалга оширмаслигини ҳам қайд этиб ўтган эди.

Туркия ташқи ишлар вазири Мавлут Чавушўғли Сурия ҳудудида қуруқликда операция ўтказиш масаласи айни вақтда кун тартибида эмаслигини аввалроқ маълум қилган эди. Бундан ташқари, вазирнинг қайд этишича, агар қуруқликда операция ўтказиш ҳақида қарор қабул қилинадиган бўлса, унда коалициянинг барча мамлакатлари қатнашиши керак.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.