Двигателдаги мойнинг паст даражаси датчиги ишлаб кетгани сабаб 26 февраль куни Тошкентда мажбурий қўнишни амалга оширган AZUR air авиакомпаниясининг Boeing-767-300 самолёти ҳозирча «Ўзбекистон ҳаво йўллари»дан техник ёрдам сўрагани йўқ. Бу ҳақда «Ўзбекистон ҳаво йўллари» миллий авиакомпанияси бош директори биринчи ўринбосари Акмал Акбаров «Дарё»га маълум қилди.
«AZUR air авиакомпанияси самолёти халқаро қоидаларга мувофиқ, Тошкент аэропортига қўнди. Ҳозирча авиакомпания техник ёрдам кўрсатишни сўраб ‘Ўзбекистон ҳаво йўллари’га мурожаат қилгани йўқ», — деди Акмал Акбаров.
Акмал Акбаровнинг қайд этишича, AZUR air авиакомпанияси Тошкент аэропортига фавқулодда қўнган Boeing-767-300 самолётидаги носозликни бартараф этиш учун «Ўзбекистон ҳаво йўллари»га мурожаат қилиши ёки ўз техник мутахассисларини Тошкентга юбориши мумкин.
«Москва — Пхукет (Таиланд)» йўналишида парвоз қилган самолёт бортида 327 йўловчи бўлган. Россиянинг Ғарбий Сибир транспорт прокуратураси маълумотларига кўра, AZUR air авиакомпанияси йўловчиларни Тошкент вақти билан 16:00 да манзилга етказиш учун иккита захира Boeing-757-300 самолётларини ажратишни режалаштирмоқда.
Изоҳ (0)