Халқаро футбол федерацияси (ФИФА) томонидан дисквалификация қилинган Индонезия ва Кувайт футбол федерациялари бугун, 26 февраль ФИФА президентини сайлашда овоз бериш ҳуқуқидан маҳрум қилинди. Бу ҳақда «ТАСС» хабар бермоқда.
Навбатдан ташқари ташкил қилинган ФИФА конгрессида ташкилотга аъзо 209 мамлакатдан 207 таси овоз беради. Индонезия ва Кувайтни ФИФА аъзолигидан чиқариб ташлаш ҳақидаги якуний қарор 2016 йилнинг май ойида қабул қилинади.
ФИФА президентлигига Осиё футбол конфедерацияси раҳбари Шайх Салмон бин Иброҳим ал-Халифа, УЕФА бош котиби Жанни Инфантино, Иордания шаҳзодаси Али бин ал-Ҳусайн, ФИФА бош котиби собиқ ўринбосари Жером Шампань ва жанубий африкалик Токио Сехвале даъвогарлик қилмоқда.
Қайд этиш жоиз, Кувайт футбол уюшмаси ўтган йилнинг октябрь ойида, мамлакат ҳукумати ташкилотнинг ишларига аралашгани сабаб ФИФА аъзолигидан дисквалификация қилинган. Индонезия футбол федерациясининг ФИФА аъзолиги ўтган йилнинг 30 майида, мамлакатнинг спорт вазирлиги билан келиб чиққан можаро туфайли вақтинча тўхтатилган. Ушбу мамлакат терма жамоалари ФИФА байроғи остида ўтказиладиган турнирларда иштирок этиш ҳуқуқидан маҳрум қилинган.
Эслатиб ўтамиз, Марказий Осиё футбол уюшмаси (CAFA), Шарқий Осиё футбол федерацияси (EAFF), ҳамда Жанубий Осиё футбол федерацияси (SAFF) ФИФА президентлиги учун сайловда Шайх Салмон бин Иброҳим ал-Халифа номзодини қўллаб-қувватлайди.
Изоҳ (0)