Нима бўлди?
23 февраль, сешанба куни Тошкентнинг Яшнобод туманида 12-йўналиш бўйлаб ҳаракатланаётган Mercedes-Benz Conecto Low Floor автобусида ёнғин келиб чиқди. Ёнғин нима сабабдан юз бергани номаълум, ҳодиса оқибатида жабрланганлар ҳақида ҳозирча ахборот йўқ.
Ҳозиргача қанча автобус ёнган?
2013 йил мартидан бери (23 февралдаги ёнғинни ҳам қўшиб ҳисоблаганда) — 15 та. Бу интернет-фойдаланувчилари бевосита гувоҳ бўлган ҳодисалар — улар ҳодиса жойидан фото ва видеоларни ижтимоий тармоқларга, видео- ва фотосервисларга юклаган, шундан сўнг мазкур ҳолат ҳақида кўпчилик хабар топган. Интернетда ёритилмаган, интернет-фойдаланувчилари гувоҳ бўлмаган бошқа ёнғин ҳолатлари ҳам бўлиши мумкин.
Шу вақтгача фақат бир хил русумдаги автобуслар ёнганми?
Йўқ. 2013 йилги дастлабки ёнғинлардан Mercedes-Benz Conecto O345 автобуслари жабр кўрган эди. 2014 йилнинг 2 декабрида, 2015 йилнинг 15 майи ва 20 июлида ҳам худди шу русумдаги автобуслар ёнган. 2014 йилнинг 14 июлида ёнган 148-автобуснинг айнан қайси русумда бўлгани ҳақида аниқ маълумот йўқ, бироқ қолган барча ҳолатларда янги автобуслар — Mercedes-Benz Conecto Low Floor’да ёнғин чиққан. Қизиқ томони, шу вақтгача бирор марта Ўзбекистонда йиғилган Isuzu (SamAvto) автобусларида ёнғин чиққани ҳақида хабар пайдо бўлмади.
Қайси йўналишдаги автобуслар кўпроқ ёнади, қайси йўналишлар хавфсизроқ?
23 февраль куни ёнган автобус ҳаракатланувчи 12-йўналишда 2014 йилнинг 5 майида ҳам худди шундай автобус ёнган — бундан бошқа ҳеч бир йўналишда биттадан ортиқ автобус ёнмаган (2013 йил 14 июнь, 2014 йил 2 декабрь ва 2015 йил 20 июлда ёнган автобусларни истисно қилганда — уларнинг йўналишлари маълум эмас). Эътиборли томони, автобус ёнғинлари бутун шаҳарни — Қўйлиқдан Қорасаройгача, Чилонзордан Юнусободгача бўлган ҳудудни қамраб олган.
Автобуслардаги ёнғинлардан йўловчилар жабрланганми?
Тошкентдаги автобус ёнғинлари оқибатида ҳеч ким ҳалок бўлмаган. Ёнғинлар ҳақидаги хабарларда жабрланувчилар ҳақида ахборот берилмаган.
Автобуслар нима сабабдан ёнаяпти ўзи?
Автобусларнинг расман эгаси ҳисобланган «Тошшаҳартрансхизмат» компанияси вакиллари автобусларнинг ёниши сабаблари ҳақида, «Дарё» ҳисоб-китобига кўра, камида тўрт марта баёнот берган. Энг биринчи, 2013 йилги баёнотда автобус ҳайдовчисининг сигарет чекиши, йўловчиларнинг салонда лак, спрей каби тез аланга олувчи воситалардан фойдаланиши ёнғинларга сабаб қилиб кўрсатилган эди.
2014 йилдан бери эса автобуслар ёнғинига асосий сабаб қилиб электр симларидаги қисқа туташувлар кўрсатилди. «Тошшаҳартрансхизмат» бош муҳандиси Мирҳосил Холматовнинг таъкидлашича, ёнғинларга «электр симлари пластик изоляцияси бутунлигининг бузилиши натижасида қисқа туташув юзага келаётгани» сабаб бўлган. 2015 йилда эса Тошкент шаҳар Ёнғин хавфсизлиги бошқармаси автобус ёнғинларига «қисқа туташув ёки автобуснинг янги эмаслиги ва техник кўрикдан ўтмаганлиги асосий сабаб бўлиши мумкин»лиги ҳақида баёнот берди.
Автобусларнинг ёнишига қарши қандай чоралар кўриляпти?
«Тошшаҳартрансхизмат» компанияси томонидан автобусларнинг ёниши билан боғлиқ ҳар бир ҳолат юзасидан ёнғин сабабларини аниқлаш бўйича хизмат текширувлари ўтказилаётгани ҳақида 2014 йилда айтилган эди. Mercedes-Benz автобусларининг ёниши билан боғлиқ ҳар бир ҳолат юзасидан бу автобусларнинг ишлаб чиқарувчиси — Evo Bus GmbH компаниясига хатлар йўлланган, улар асосида компания экспертлари мустақил текширувлар ўтказган. «Автобусларнинг ёниб кетиш ҳолларига йўл қўймаслик мақсадида йўналишга чиқарилаётган транспорт воситаларининг техник ва санитария ҳолати ҳар куни назорат қилинмоқда», — деган эди «Тошшаҳартрансхизмат» бош муҳандиси Мирҳосил Холматов. Бу йўналишда (яъни, автобусларнинг ёниб кетиши ҳолатларининг олдини олиш йўналишида) Тошкент шаҳар Ёнғин хавфсизлиги бошқармаси ҳам иш олиб боряпти, бироқ айнан қандай ишлар олиб борилаётгани аниқ айтилмаган.
Изоҳ (0)