Футзал бўйича Тошкентда ўтказилаётган Осиё чемпионатининг биринчи ярим финал ўйини якунига етди. Унда Ўзбекистон ва Таиланд терма жамоалари ўзаро майдонга тушди.
Учрашувнинг 23-дақиқасида Ўзбекистон терма жамоаси футболчиси Дилшод Раҳматов ҳисобни очди. Аммо орадан бир дақиқа ўтгач таиландлик Жецада Чудеч орадаги мувозанатни тиклади. Асосий вақт тугагунча ҳисоб ўзгармади ва ҳакам 5 дақиқадан иккита қўшимча вақт белгилади.
Қўшимча вақтнинг биринчи дақиқасидаёқ таиландликлар олдинга чиқиб олди. Аммо 48-дақиқада Артур Юнусов ҳисобни тенглаштирди ва ўйин 2:2 ҳисобида якунланди.
Пенальтилар сериясида омад Ўзбекистонга кулиб боқди. Пенальтилар сериясида Феруз Фахриддинов, Дилшод Ирсалиев ва Константин Свиридов ўз зарбаларини аниқ бажарди. Таиландликларнинг иккинчи зарбасини эса Ўзбекистон дарвозабони қайтарди.
Шу тариқа, Ўзбекистон ўз тарихида тўртинчи марта Осиё чемпионати финалига чиқди. Аммо ўтган сафарларда Ўзбекистон фақат кумуш медаль билан кифояланган. Бу сафар Ўзбекистон термасига финалда омад тилаб қоламиз.
Ўзбекистоннинг финалдаги рақиби 19:00 да бошланадиган Эрон — Вьетнам ўйинидан кейин маълум бўлади.
Футзал. ОЧ—2016. Ярим финал
Ўзбекистон — Таиланд — 2:2 (асосий вақт: 1:1, пенальтилар бўйича: 3:1)Голлар: Дилшод Раҳматов (23), Артур Юнусов (48) — Жецада Чудеч (24), Апиват Чаемчареон (41).
Изоҳ (0)