Apple корпорацияси раҳбари Тим Кук Калифорния штатининг Сан-Бернардино шаҳрида теракт уюштирган жиноятчининг телефон ҳимоясини бузишда ёрдам бериш борасидаги суд қарорига расмий эътироз билдирилишини таъкидлаб ўтди. Бу ҳақда компания сайтида жойлаштирилган баёнотга таянган ҳолда «ТАСС» агентлиги хабар бермоқда.
Илгари хабар қилинганидек, сешанба, 16 февраль куни судья Шери Пим АҚШнинг Apple корпорацияси Федерал қидирув бюроси ходимларига «Сан-Бернардино мергани»нинг телефонини бузиб, ундаги маълумотларни олишда ёрдам бериши лозимлиги ҳақида қарор қабул қилди.
Суд қарорига мувофиқ, корпорация шу пайтга қадар террорчилардан бири Саид Фаруқнинг мобил ускунаси маълумотларига бузиб кира олмаётган ФҚБ ходимларига махсус дастурий таъминот тақдим этиши талаб қилинади.
«Қўшма Штатлар ҳукумати Apple’дан мижозларимиз хавфсизлигини шубҳа остига қўядиган мислсиз қадам ташлашни талаб қилди, – дейилади Кукнинг баёнотида. – Биз бу кўрсатмага қарши чиқамиз, зеро унинг оқибатлари кўрилаётган юридик иш доирасидан ташқарига чиқиб кетади».
Тим Кук корпорациянинг барча вакиллари Калифорнияда содир этилган жиноятдан даҳшатда эканлигини, шунингдек, ФҚБга терговда керак бўладиган барча маълумотлар аллақачон тақдим этиб бўлинганини айтиб ўтди. Шу билан бирга, iPhone ҳимоясини буза оладиган дастурий таъминот махсус органларга тақдим этилмаслиги яна бир бора таъкидланди.
«Ҳукумат Apple’дан ўз фойдаланувчиларини хакерлик ҳужумига дучор қилиб, ўнлаб йиллар давомида хавфсизлик соҳасида эришилган ютуқларни йўққа чиқаришни талаб қилмоқда, лекин бу ютуқлар мижозларимизни, шу жумладан, ўн миллионлаб америкаликларни хакерлар ва кибержиноятчилардан ҳимоя қилиш йўлида хизмат қилмоқда», – дейилади баёнот матнида.
Эслатиб ўтамиз, 2015 йилнинг 2 декабрь куни АҚШ фуқароси Саид Фаруқ турмуш ўртоғи Тешфин Малик билан Сан-Бернардинодаги ногиронларга ёрдам кўрсатиш марказига уюштирган ҳужуми оқибатида 14 киши ҳалок бўлган, 21 киши жароҳат олган эди. Полиция томонидан йўқ қилинган террорчилар ИШИДга даҳлдорлиги айтилган эди.
Изоҳ (0)