Ижтимоий тармоқлар, айниқса, Instagram шоу-бизнеснинг ажралмас қисмига айланиб улгурди. Унда эстрада хонандаси ёки таниқли актёр ўз ҳаёти, ижоди ҳақида ахборот бериш билан бирга, мухлислари билан бевосита мулоқот уюштириш имконига эга.
Бироқ, машҳурлар номидан сохта саҳифа очиб, минглаб кишилик аудиторияларни тўплаб, содда фойдаланувчиларнинг ишонувчанлигидан фойдаланиб, машҳур кишилар ҳақида турли миш-мишларни тарқатаётганлар ҳам йўқ эмас.
Хонанда Шаҳзода
Шаҳзода Instagram’да энг фаол ўзбекистонлик хонандалардан бири, унинг саҳифаси — @shahzodasinger’га 563 мингдан ортиқ фойдаланувчи обуна бўлган. Шунга қарамай, хонанда номидан очилган бир қанча сохта аккаунтлар ҳам бўлиб ҳар бирига минглаб ўқувчи обуна бўлган.
Шаҳзоданинг маъмури Даврон Муқимовнинг айтишича, «бировнинг номини сотиш — жуда хунук иш», хонанданинг ўзи бундай сохта аккаунтларга «жуда қарши».
«Шаҳзода Instagram’да анчадан бери ўз саҳифасини юритиб келади. Сохта ва ҳақиқий Шаҳзода кимлигини ҳамма билади. Аммо, нима бўлганда ҳам, бу иш бизга маъқул эмас. Иложи бўлса, шундай сохталикка чек қўйилишини истардик», — деди Даврон Муқимов.
Актриса Шаҳло Темирова
«Эътироф—2015» тақдимотида «Йилнинг энг яхши театр актрисаси» деб топилган Шаҳло Темирова номидан Instagram’да очилган саҳифани кўриб, уни актрисанинг ўзи юритаяпти, деган тасаввур уйғонади. Аккаунт сохта бўлгани ҳолда, бошқа бир актриса — Диана Ягафоранинг Instagram’да сохта саҳифаларидан эҳтиёт бўлишга чақиришини кўриб, ҳайрон қоласан киши.
Сохта @shahlotemirova аккаунтини ҳозирда 3 мингдан ортиқ фойдаланувчи кузатиб бормоқда, Шаҳло Темированинг ўзи эса бу сохта профилни ўчириб беришни илтимос қилмоқда: «Instagram’да умуман профил очмаганман, бу ҳақда ўйлаб ҳам кўрмаганман».
Актриса Шаҳзода Муҳамедова
Шаҳзода Муҳаммедова ҳам ўзининг сохта вариантлари билан курашиб, тоқати тоқ бўлганлардан. Instagramда бу актриса номидан камида 5-6 та сохта аккаунт очилган (ҳақиқийси — @shaxzoda__muxammedova). Унинг айтишича, бир сафар шундай сохта аккаунтлардан бири: «Нега менинг номимдан профил очиб олдинг?», — дея Шаҳзода Муҳамедова билан тортишган.
«Бугун бирор расм қўйсам, дарров ўз профилларига кўчириб олади. Кейин нафақат мухлислар, балки дўстларим ҳам ҳақиқий Шаҳзода Муҳаммедова ким эканлигини билмай қоляпти», — деди актриса.
Шаҳзода Муҳамедованинг фикрича, унинг номидан сохта профил очганларнинг мақсади «йигитлар билан танишиш ёки орқамдан ёмон ишлар қилиш эмас, балки санъаткор дўстларим ёки бошқа санъаткорлар билан мулоқот қилиб ўтириш».
Хонанда Озодбек Назарбеков
Instagram’даги @ozodbek_nazarbekov саҳифасини 43 минг, @ozodbeknazarbekov саҳифасини эса 10 минг фойдаланувчи кузатиб боради, бироқ уларнинг ҳеч бири Озодбек Назарбековга боғлиқ эмас. «Озодбек Назарбеков Instagram’га умуман кирмаган. Вақтни кўп олиб қўйгани сабабли ижтимоий тармоқларга унча хоҳиш билдирмаган», — дейди хонанданинг матбуот котиби Дилбаҳор Худойбердиева.
Дилбаҳор Худойбердиеванинг айтишича, ўқувчилари сони бир неча ўн мингга етган «Озодбек Назарбеков»ларни ким юритаётгани номаълум. «Озодбек Назарбеков бу саҳифаларни матбуот котибим юритаётган бўлса керак, деб индамай юрган эканлар. Биз Instagram’га бу профиллар сохталигини билдириб, расмий хат ҳам ёзганмиз. Тез орада сохта Назарбековлар ўчирилади» — деди Дилбаҳор Худойбердиева.
Изоҳ (0)