Ijtimoiy tarmoqlar, ayniqsa, Instagram shou-biznesning ajralmas qismiga aylanib ulgurdi. Unda estrada xonandasi yoki taniqli aktyor o‘z hayoti, ijodi haqida axborot berish bilan birga, muxlislari bilan bevosita muloqot uyushtirish imkoniga ega.
Biroq, mashhurlar nomidan soxta sahifa ochib, minglab kishilik auditoriyalarni to‘plab, sodda foydalanuvchilarning ishonuvchanligidan foydalanib, mashhur kishilar haqida turli mish-mishlarni tarqatayotganlar ham yo‘q emas.
Xonanda Shahzoda
Shahzoda Instagram’da eng faol o‘zbekistonlik xonandalardan biri, uning sahifasi — @shahzodasinger’ga 563 mingdan ortiq foydalanuvchi obuna bo‘lgan. Shunga qaramay, xonanda nomidan ochilgan bir qancha soxta akkauntlar ham bo‘lib har biriga minglab o‘quvchi obuna bo‘lgan.
Shahzodaning ma’muri Davron Muqimovning aytishicha, “birovning nomini sotish — juda xunuk ish”, xonandaning o‘zi bunday soxta akkauntlarga “juda qarshi”.
“Shahzoda Instagram’da anchadan beri o‘z sahifasini yuritib keladi. Soxta va haqiqiy Shahzoda kimligini hamma biladi. Ammo, nima bo‘lganda ham, bu ish bizga ma’qul emas. Iloji bo‘lsa, shunday soxtalikka chek qo‘yilishini istardik”, — dedi Davron Muqimov.
Aktrisa Shahlo Temirova
“E’tirof—2015” taqdimotida “Yilning eng yaxshi teatr aktrisasi” deb topilgan Shahlo Temirova nomidan Instagram’da ochilgan sahifani ko‘rib, uni aktrisaning o‘zi yuritayapti, degan tasavvur uyg‘onadi. Akkaunt soxta bo‘lgani holda, boshqa bir aktrisa — Diana Yagaforaning Instagram’da soxta sahifalaridan ehtiyot bo‘lishga chaqirishini ko‘rib, hayron qolasan kishi.
Soxta @shahlotemirova akkauntini hozirda 3 mingdan ortiq foydalanuvchi kuzatib bormoqda, Shahlo Temirovaning o‘zi esa bu soxta profilni o‘chirib berishni iltimos qilmoqda: “Instagram’da umuman profil ochmaganman, bu haqda o‘ylab ham ko‘rmaganman”.
Aktrisa Shahzoda Muhamedova
Shahzoda Muhammedova ham o‘zining soxta variantlari bilan kurashib, toqati toq bo‘lganlardan. Instagramda bu aktrisa nomidan kamida 5-6 ta soxta akkaunt ochilgan (haqiqiysi — @shaxzoda__muxammedova). Uning aytishicha, bir safar shunday soxta akkauntlardan biri: “Nega mening nomimdan profil ochib olding?”, — deya Shahzoda Muhamedova bilan tortishgan.
“Bugun biror rasm qo‘ysam, darrov o‘z profillariga ko‘chirib oladi. Keyin nafaqat muxlislar, balki do‘stlarim ham haqiqiy Shahzoda Muhammedova kim ekanligini bilmay qolyapti”, — dedi aktrisa.
Shahzoda Muhamedovaning fikricha, uning nomidan soxta profil ochganlarning maqsadi “yigitlar bilan tanishish yoki orqamdan yomon ishlar qilish emas, balki san’atkor do‘stlarim yoki boshqa san’atkorlar bilan muloqot qilib o‘tirish”.
Xonanda Ozodbek Nazarbekov
Instagram’dagi @ozodbek_nazarbekov sahifasini 43 ming, @ozodbeknazarbekov sahifasini esa 10 ming foydalanuvchi kuzatib boradi, biroq ularning hech biri Ozodbek Nazarbekovga bog‘liq emas. “Ozodbek Nazarbekov Instagram’ga umuman kirmagan. Vaqtni ko‘p olib qo‘ygani sababli ijtimoiy tarmoqlarga uncha xohish bildirmagan”, — deydi xonandaning matbuot kotibi Dilbahor Xudoyberdiyeva.
Dilbahor Xudoyberdiyevaning aytishicha, o‘quvchilari soni bir necha o‘n mingga yetgan “Ozodbek Nazarbekov”larni kim yuritayotgani noma’lum. “Ozodbek Nazarbekov bu sahifalarni matbuot kotibim yuritayotgan bo‘lsa kerak, deb indamay yurgan ekanlar. Biz Instagram’ga bu profillar soxtaligini bildirib, rasmiy xat ham yozganmiz. Tez orada soxta Nazarbekovlar o‘chiriladi” — dedi Dilbahor Xudoyberdiyeva.
Izoh (0)