Антарктида шарқидаги Денисон бурнида макон қурган Адели пингвинларининг сони 2011 йилдан буён 160 мингдан 10 мингга тушиб қолди. Улкан айсбергнинг улар яшайдиган қирғоқни денгиздан тўсиб қўйиши бунинг бирламчи омили бўлди, деб ҳисоблайди тадқиқотчилар. Илмий тафтиш натижалари Antarctic Science журналида чоп этилди, The Guardian газетаси бу ҳақда қисқача ахборот тақдим этди.
Материалда айтилишича, пингвинлар қирғоқ бўйида яшаб келган, аммо 2010 йили бу ерга 2900 квадрат километр майдонга эга B09B айсберги келиб қолиб, пингвинлар колониясини денгиздан узиб қўйган.
Жониворлар озиқ қидириб 60 километр масофани босиб ўтиши бу популяциянинг ҳаётига ҳалокатли таъсир кўрсатган. Фақат муздаги ёриқлардан балиқ овлашни ўрганган жуфтликлар омон қолган.
Шу билан бирга, Адели пингвинларининг 8 километр узоқликда жойлашган бошқа бир жамоаси гуллаб-яшнамоқда. Бу ҳам пингвинларнинг биринчи колонияси фожиаси B09B айсберги билан боғлиқлигини кўрсатади.
Олимларнинг тахминий ҳисоб-китобларига қараганда, агарда денгиз тўлқинлари айсбергни бўлиб юбормаса, пингвинларнинг қолгани ҳам 20 йил ичида қирилиб кетади.
Изоҳ (0)