Ўзбекистон бензин нархи арзон мамлакатлар рейтингида 70-ўриндан жой олди

Ўзбекистон бензин нархи арзонлиги бўйича жаҳон мамлакатлари орасида 70-ўринни эгаллади. Бу ҳақда Global Petrol Prices лойиҳасида маълумот берилган.

Лойиҳа томонидан тузилган рейтингга кўра, энг арзон бензин Венесуэла, Кувайт ва Саудия Арабистонида сотилади. Туркманистон 4-ўриндан жой олган бўлса, 8-ўринда Қозоғистон, 16-ўринда Россия, 18-ўринда Қирғизистон, 43-ўринда Тожикистон бормоқда.

Рейтингда 178 мамлакат ва ҳудуд қамраб олинган. Лойиҳа маълумотларига кўра, 8 февраль ҳолатига кўра, жаҳон бўйича бир литр нефть нархи ўртача 96 центга тенг.

Ўзбекистон бўйича маълумотларни тақдим этишда бензиннинг эски нархларидан фойдаланилган ва жорий курс бўйича кўрсатилган. 2015 йилда Ўзбекистонда Аи-95 бензини бир литри 2460 сўм эди, шунда Марказий банкнинг 2016 йил 8 февраль курси билан ҳисоблаганда, ёнилғининг нархи 86 центга тенг бўлади.

Маълумот учун, Ўзбекистонда 1 январдан бошлаб Аи-80 бензини бир литри нархи 2075 сўм, Аи-95 бензини бир литри нархи эса 2505 сўмга тенг. Марказий банкнинг 8 февралдаги курси билан ҳисоблаганда, Аи-95 бензини бир литри нархи тахминан 88 центга тўғри келади.