Ўзбекистон божхоначилари томонидан алкоголь маҳсулотларининг божхона чегаралари орқали ноқонуний олиб ўтилишининг олдини олишга қаратилган чора-тадбирлар фаол олиб бормоқда. Бу ҳақда Давлат божхона қўмитаси Ахборот хизмати «Дарё»га хабар берди.
Яқинда Тошкент шаҳар божхона бошқармасининг «Келес» темир йўл чегара божхона пости ходимлари томонидан Нукус—Олмаота йўловчи поездини божхона назоратидан ўтказиш чоғида қўшни давлат фуқароси Ж.Жуманов (мақоладаги барча исм-шарифлар ўзгартирилган) томонидан божхона баённомасида кўрсатилмаган ва оғзаки сўровда маълум қилинмаган қиймати салкам 2 миллион сўмлик 60 литр ҳажмдаги 120 дона спиртли ичимликларни яширин равишда олиб ўтишга урингани фош бўлди.
Шунингдек, «Бошпочтампт» божхона пости ходимлари Италиядан фуқаро Д.Авдеев номига юборилган почта жўнатмасини амалдаги тартибларга мувофиқ божхона кўригидан ўтказганда, жўнатмадаги буюмлар орасида қиймати салкам 5,5 миллион сўмлик 24 литр ҳажмдаги 32 дона вино борлиги аниқланди.
«Тошкент-Аэро» ихтисослаштирилган божхона комплекси ходимлари томонидан ҳам ҳаво йўллари орқали алкоголли ичимликларнинг ноқонуний равишда олиб кирилишига оид божхона қоидабузарликлари фош этилди.
Жумладан, Сеул—Тошкент рейси бўйича парвозини якунлаган йўловчи Р.Хамдамовага тегишли йўл сумкаси божхона кўригидан ўтказилганида, ушбу аёл йўловчи божхона декларациясида кўрсатмаган ва божхона ходимининг оғзаки сўрови пайтида маълум қилмаган салкам 90 литр ҳажмдаги 139 дона соджу алкоголли ичимликларини яширин равишда олиб киришга урингани аниқланди.
Нью-Йоркдан учиб келган йўловчи Д.Жўрақулов ҳам божхоначиларнинг кўзини шамғалат қилишга уриниб, 7 турдаги 13 шиша алкоголли ичимликларни олиб киришга уринган пайтда тўхтатиб қолинди.
Эслатиб ўтамиз, жисмоний шахслар томонидан товарларни акциз солиғи тўламасдан Ўзбекистонга олиб кириш меъёрларига мувофиқ фақат 2 литргача бўлган барча турдаги алкоголь маҳсулотларини республикага бемалол олиб киришга рухсат этилади.
Таъкидлаш жоизки, ўтган 2015 йил давомида Ўзбекистон божхоначиларининг ҳуқуқни муҳофаза қилувчи бошқа идоралар вакиллари билан ҳамкорликда олиб борган чора-тадбирлари натижасида аниқланган 66 та қонунбузарлик ҳолатларида қиймати салкам 110 миллион сўмлик 3 минг литрдан ортиқ спирт ва алкоголли маҳсулотларнинг ноқонуний олиб ўтилишига чек қўйилган.
Ҳозирда юқоридаги ҳолатлар юзасидан божхона текширувлари ва суриштирув ҳаракатлари давом эттирилмоқда.
Олдинроқ Ўзбекистон божхоначилари 2015 йил давомида 6 мингдан зиёд беҳаё мазмундаги материалларнинг олиб ўтилишига чек қўйгани хабар берилганди.
Изоҳ (0)