Муҳаммад Юсуфнинг «Дўлана» деб номланган шеъри Ўзбекистон Халқ артисти Нуриддин Ҳайдаров томонидан 1991 йилда гўзал таронага айлантирилиб, куйланган эди. Мана орадан йиллар ўтиб, унинг фарзанди Ҳожиакбар Ҳайдаров «Дўлана» таронасини қайтадан ижро этди. Бу ҳақда хонанданинг матбуот котиби «Дарё»га хабар берди.
Қўшиққа замонавий руҳ бериш мақсадида бастакор Илҳом Маматов муаллифлигида «Дўлана»га янги мусиқа ёзилди. Тарона учун клипмейкер Шуҳрат Мавлонов томонидан трек йўналишида видеоклип ҳам тасвирга олинди. Клипда Ҳожиакбар Ҳайдаровдан ташқари, машҳур актёрлар Теша Мўминов, Эркин Комилов, Умид Искандаров, Йигитали Мамажонов ҳамда опа-сингил Муҳаббат ва Малика Қурбонова суратга тушди.
Бундан ташқари, клип учун катта-кичик шаклдаги махсус дўланалар тайёрланди. Яқин кунларда «Дўлана» янгича оҳангда жаранглаб, оммага тақдим этилади.
Изоҳ (0)