Дзюдо бўйича Ўзбекистон термаси Париждаги «Катта Дубулға» турнирида умумжамоа ҳисобида 27-ўринни эгаллади

Франция пойтахти Париж шаҳрида дзюдо бўйича «Катта Дубулға» туркумига кирувчи нуфузли турнир ўз якунига етди. Мусобақада 90 дан зиёд давлатдан энг сара татами усталари иштирок этди. Улар орасида Ўзбекистон терма жамоаси дзюдочилари ҳам ўз имкониятларини синовдан ўтказди, деб хабар беради «Оламспорт».

Ўзбекистонлик дзюдочилар Judo Grand-Slam Paris 2016 мусобақасида бирорта ҳам медалга эга бўлолмади. Терма жамоанинг энг яхши натижаси 5-ўрин бўлди, холос. Мусобақанинг илк кунида Шарофиддин Лутфуллаев -60 кг вазн тоифасида 5-ўринни банд этганди.

Ўзбекистон термасининг қолган барча полвонлари – Олимпия ўйинларининг икки карра бронза медаль соҳиби Ришод Собиров, шунингдек, Шарофиддин Болтабоев, Ғиёсжон Бобоев, Яҳё Имомов, Шерали Жўраев, Сойиб Қурбонов, Рамзиддин Саидов ҳамда энг оғир +100 кг вазндаги Абдулла Тангриевлар биринчи, нари борса иккинчи давра баҳсида рақибларига имкониятни бой берди.

Якунда Ўзбекистон терма жамоаси 91 та давлат орасида 27-поғонадан жой олди. Кутилганидек, Япония терма жамоаси умумжамоа ҳисобида биринчи ўринни эгаллади. Дзюдо ватани вакиллари бешта олтин, иккитадан кумуш ва бронза медалларини жамғарди. Кучли учликдан Жанубий Корея ва Франция терма жамоалари жой олди.