Тайваннинг Тайнань махсус муниципалитетида содир бўлган кучли зилзила қурбонлари сони 23 кишига етди. Бу ҳақда Хитойнинг Sina портали берган маълумотларга асосан «ТАСС» хабар қилмоқда.
Олдинроқ 6 февраль, шанба куни содир бўлган зилзила қурбонлари сони 18 кишига етганлиги хабар қилинган эди.
Юнкан ҳудудидаги «Вэйгуань» турар-жой биноси вайроналари остида яна 120 нафарга яқин одам қолиб кетганлиги тахмин қилинмоқда.
Кўп қаватли бино қолдиқларини ажратиш операцияси бўйича қидирув-қутқарув ишларига 600 нафардан зиёд одам, 150 тадан зиёд техника жалб қилинган.
17 қаватли бинонинг вайроналари остида қурбон бўлганлар сони 23 кишини ташкил этмоқда, улардан олти нафари болалардир.
Таъкидланишича, бинода 96 та хонадон бўлиб, 256 киши истиқомат қилиб келган. Ерости силкиниши оқибатида бино иккига бўлиниб, унинг юқори қисми ерга қулаб тушган. Расмийларнинг тахмин қилишича, уй сифатсиз материаллардан, қурилиш қоидаларига риоя қилинмасдан қурилган. Ҳодиса бўйича тегишли суриштирув ишлари олиб борилиши маълум қилинмоқда.
Изоҳ (0)