Шимолий Корея 7 февраль, якшанбага ўтар кечаси узоқ масофага парвоз қилувчи ракетани учирди. Бу ҳақда Жанубий Корея мудофаа вазирлигига таяниб, Reuters хабар бермоқда, деб ёзади «РБК».
Ушбу маълумотни Япония ҳам тасдиқлади. Ҳукумат маълумотларига кўра, парвоз маҳаллий вақт билан 09:31 (Тошкент вақти билан 05:31)да Окинава йўналишида амалга оширилган.
Япония бош вазири Синдзо Абэ ракетанинг учирилиши «бутунлай номаъқул» эканлигини айтди. АҚШ мудофаа вазирлиги вакили Reuters’га Вашингтон КХДР ракета учириши муносабати билан «вазиятни назорат қилиб туриши»ни маълум қилди.
Ҳодиса туфайли, АҚШ, Япония ва Жанубий Корея БМТ Хавфсизлик Кенгаши фавқулодда мажлисини ўтказиш ҳақидаги сўров билан чиқди. Йиғилиш 7 февраль, якшанба куни Тошкент вақти билан 21:00 да бўлиб ўтиши мумкин.
Эслатиб ўтамиз, аввалроқ АҚШ разведка муассасалари 7 февраль, якшанба куни Шимолий Корея ракета ташувчиси сунъий йўлдошни орбитага олиб чиқишини тахмин қилган эди.
Шимолий Корея БМТнинг тегишли агентликларини 8—25 февраль кунлари оралиғида сунъий йўлдош учирилиши ҳақида огоҳлантирган, бироқ кейинроқ муддат 7—14 февралгача бўлган вақтга кўчирилган эди.
Изоҳ (0)