Туркия Су-24 самолёти уриб туширилганидан сўнг юзага келган муаммоларни дипломатик йўл билан муҳокама этиш ва ҳал қилишга ҳаракат қиляпти, бироқ Россия кескинликни кучайтирадиган қадамлар ташламоқда. Бу ҳақда Туркия президентининг матбуот котиби Иброҳим Қалин маълум қилди, дея хабар беради «РБК».
Унинг айтишича, Россия ўзини «мантиқсиз тарғибот, асоссиз айблов ва алдовга урғу бераётган, жиддий бўлмаган давлат» сифатида тутмоқда.
«2016 йил 29 январь куни Россия яна Туркия ҳаво чегарасини бузди. Шундан сўнг президент Эрдўғон Владимир Путин билан телефон орқали боғланишга ҳаракат қилди, бироқ Россия томони бунга рўйхушлик бермади», — дея таъкидлаган Қалин.
Бу ҳолат Москванинг Анқара мазкур масалаларни Россия билан эмас, НАТОдаги шериклари билан муҳокама этаётгани ҳақидаги баёнотлари самимий эмаслигидан далолат беради. «Бир томондан, Путин Эрдўғон билан мулоқотдан ўзини олиб қочяпти, иккинчи томондан, ‘биз билан ҳеч ким боғланмади’, деб даъво қилади», — дея таажжубини билдирган матбуот котиби.
Эслатиб ўтамиз, олдинроқ Путин Туркия президенти билан учрашишдан бош тортгани ҳақида хабар берилганди.
Изоҳ (0)