Chevrolet компанияси Деҳлидаги Auto Expo кўргазмасида кичик Beat хэтчбеки (бошқа мамлакатлар, хусусан, Ўзбекистон бозорида Spark билан сотилади) базасида ишлаб чиқилган Beat Activ концепт-карини намойиш этди. Motor’нинг ёзишича, ушбу прототип омма эътиборига кейинроқ ҳавола этилиши кутилаётган моделнинг «ҳар қандай йўлда юра оладиган» версияси ҳақида тасаввур беради.
Концепт-кар General Motors’нинг Жанубий Кореядаги дизайн-студияси томонидан ишлаб чиқилган. Хэтчбекнинг клиренси оширилган, багаж бўлмасига бошқа эшик ўрнатилган, кузовнинг қуйи қисми пластик ҳимоя билан таъминланган, рейлинглар, спойлер ва ўзига хос туманга қарши чироқлар ўрнатилган.
Бозор учун мўлжалланган модель Ҳиндистондаги Beat автомобили платформасида ишлаб чиқилади. Ўз навбатида, у 2015 йил баҳорида тақдимоти бўлиб ўтган янги авлод Spark’идан ҳам баъзи жиҳатларни ўзлаштиради. Дастлабки маълумотларга кўра, машинанинг двигателлар гаммасида ҳажми 1,2 литрли бензин- ва бир литрли дизел-мотор бор. Биринчиси 78 от кучига, иккинчиси эса 57 от кучига эга.
Хабар беришларича, Chevrolet Beat Аcтив Ҳиндистон автобозорида Hyundai i20 Active, Toyota Etios Cross, Fiat Avventura ва Volkswagen Cross Polo билан рақобатлашади.
Аввалроқ Ҳиндистондаги автокўргазма доирасида Chevrolet Spark’нинг седан версияси намойиш этилгани ҳақида хабар берилганди.
Изоҳ (0)