«Тошкент» вокзалидан «ТТЗ» бозорига қадар қатновчи 14-йўналишдаги автобуслар Wi-Fi билан таъминланди. Бу ҳақда Facebook’даги «Потребитель.уз» гуруҳи фойдаланувчиси фотохабар қолдирган.
«Бугун автобусдаги бепул ва яхши тезликдаги Wi-Fi интернетдан фойдаландим. Олдинга ташланган катта қадам!», — деб ёзади фойдаланувчи.
Автобус чиптачисининг Facebook’да хабар қолдирган йўловчига маълум қилишича, ҳозирча Wi-Fi фақат 14-йўналишдаги автобусларда бор.
Фойдаланувчи автобус ичидаги Wi-Fi ҳақидаги эълон суратини ҳам илова қилган. Эълонда: «Бу автобусда Wi-Fi бор», деб ёзилган ва уланиш мумкин бўлган тармоқ номи («WI-FI-BUS») кўрсатилган.
Фойдаланувчининг қайд этишича, автобусда бепул Wi-Fi’дан фойдаланаётган ёшлар кўп бўлса-да, интернет тезлиги пасаймаган. Гуруҳнинг бошқа аъзолари автобуслардаги мазкур янгиликни олқишлаган.
Бир қатор фойдаланувчилар бошқа шаҳарларнинг жамоат транспортларида ҳам шундай янгиликлар жорий этилишига умид билдирган. Баъзилар эса, ҳазилнамо тарзда, «бепул интернет иштиёқмандлари дастидан энди бу автобусга чиқиб бўлмайди», деб ёзган.
Аввалроқ Самарқанд шаҳридаги 61-йўналишдаги автобусларда йўловчиларга Wi-Fi таклиф қилинаётгани ҳақида хабар берилган эди.
Изоҳ (0)