Бельгиянинг Антверпен шаҳрида сузиш бўйича ўтказилган халқаро турнирда ўзбекистонлик Раънохон Аманова 400 метр масофага комплекс усулда сузиш мусобақасида марра чизиғига 4.40.71 сонияда етиб келиб, XXXI ёзги Олимпиада ўйинлари йўлланмаси учун белгиланган меъёрни бажарди. Бу ҳақда Ўзбекистон Миллий олимпия қўмитаси матбуот хизмати хабар бермоқда.
Шу тариқа, Раънохон Рио—2016 Олимпиада ўйинларида икки йўналиш бўйича ўтказиладиган мусобақаларда қатнашиш ҳуқуқини қўлга киритди.
Эслатиб ўтамиз, Аманова 2015 йилнинг 2—3 ноябрь кунлари Доҳа шаҳри (Қатар)да ўтказилган Жаҳон Гран-При турнирида 200 метр масофага комплекс усулда сузиш мусобақаларида муваффақиятли иштирок этган ва Бразилиянинг Рио-де-Жанейро шаҳрида ўтказиладиган Олимпиада ўйинлари йўлланмаси учун белгиланган меъёрни бажарган эди.
Ҳозирга қадар Рио—2016 ўйинларига 52 нафар ўзбекистонлик спортчи йўлланма олди. Шундан 24 нафари паралимпиячиларга тегишли.
Маълумот учун. Ўзбекистон спортчилари бугунги кунга келиб 2016 йилнинг 5—21 август кунлари Рио-де-Жанейро шаҳрида ўтказиладиган XXXI ёзги Олимпиада ўйинларига енгил атлетика спорт турида 8 та, бокс, байдарка ва каноэда эшкак эшиш ҳамда оғир атлетика спорт турларида 5 тадан, сузиш спорт турида 2 та, таэквондо (WTF), эркин ва юнон рум кураши спорт турларида 1 тадан йўлланмаларни қўлга киритди. Паралимпиячилар эса енгил атлетика спорт турида 10 та, дзюдо спорт турида 8 та, сузиш спорт турида 4 та, ўқ отиш ҳамда пауэрлифтинг спорт турларида 1 тадан йўлланмага эга.
Изоҳ (0)