Осиё футбол конфедерацияси, Эрон ва Саудия Арабистони ўртасидаги муносабатларнинг кескинлашиб кетгани сабаб, Осиё Чемпионлар лигаси тақвимига ўзгартириш киритди. Бу ҳақда ОФК расмий сайти хабар бермоқда.
Саудия Арабистони ва Бирлашган Араб Амирликлари футболи раҳбариятлари, Эрон ва араб мамлакатлари ўртасида юзага келган келишмовчиликлар сабаб, терма жамоалар ва клублар ўртасидаги барча учрашувларни, «жамоалар ва делегациялар хавфсизлигини таъминлаш мақсадида», қолдириш ё кечиктиришни сўраганди.
Ўз навбатида, Эрон футбол федерацияси ОФКдан футболга сиёсатни аралаштирмасликни сўраган ва Эронни «минтақадаги энг хавфсиз мамлакатлардан бири» деб айтиб ўтганди. ЭФФнинг маълум қилишича, Эрон «турли халқаро мусобақаларда қатнашаётган терма жамоалар ва клубларнинг хавфсизлигини таъминлашга интилади».
Шундан келиб чиқиб, ОФК Мусобақалар қўмитаси Осиё Чемпионлар лигаси гуруҳ босқичи доирасида февраль—март ойларида ўтказиладиган Эрон ва Саудия Арабистони клублари ўртасидаги учрашувларни апрель—май ойларига кўчиришга қарор қилди.
Қўмита 2016 йил 15 мартга қадар воқеалар ривожини кузатади. Агар Эрон ва Саудия Арабистони ўртасидаги муносабатлар бу даврга келиб барқарорлашмаса, ҳар икки мамлакат клублари ўртасидаги кейинги учрашувларнинг барчаси бетараф майдонларда ўтказилади.
Эслатиб ўтамиз, Саудия Арабистони томонидан нуфузли шиалик уламоси Нимр ан-Нимрнинг қатл этилиши Эрон ва Саудия Арабистони ўртасидаги муносабатларининг кескинлашувига сабаб бўлди.
Изоҳ (0)