Киевнинг «Динамо» клуби собиқ ҳужумчиси, айни вақтда эркин агент мақомига эга Максим Шацких Ўзбекистон терма жамоасидаги фаолиятини якунлаши ва Украина фуқаролигини олиши ҳақидаги саволларга жавоб бериб ўтди. Бу ҳақда футболчининг «Sport.ua» нашрига берган интервьюсига асосан «Uff.uz» хабар бермоқда.
- Сизда ҳозир икки давлат фуқаролиги борми?- Йўқ. Икки давлат фуқаролигига эга бўлиш Украинада ҳам, Ўзбекистонда ҳам тақиқланган.
- Демак, ҳозирда сизда фақат Украина паспорти бор.- Ҳа.
- Паспорт қачон берилганини айта оласизми?- Йўқ, бунинг учун паспортга қарашим керак. Менимча, бунинг аҳамияти ҳам у қадар катта бўлмаса керак.
- Балки сананинг аҳамияти бўлмаслиги мумкин, аммо Ўзбекистон миллий терма жамоасида шунча йил ўйнаганингиз ва у ерда энг яхши футболчи сифатида тан олинганингиздан сўнг фуқароликни ўзгартирганингиз... Нима учун бундай қилдингиз?- Киевга илк бора келганимиздан сўнг оилам бу ерда яшаб қолишга қарор қилган эди. Хотиним ва фарзандларим Киевни жондан ортиқ яхши кўради. Аммо мен шунда ҳам Ўзбекистон терма жамоасида ўйнашда давом этавердим. Фақат терма жамоанинг асосий таркибига кириш қийин бўлишини англаб етганимдан сўнг бирор муаммо бўлмаслиги учун фуқаролигимни ўзгартиришга қарор қилдим. Терма жамоада шунчаки сайёҳ бўлиб юришни эса истамадим.
Икки давлат фуқаролигини олиш мумкин бўлганида, бу жуда ва жуда ажойиб иш бўлар эди. Ўзбекистон, Тошкент — бу менинг Ватаним. Айнан шу тупроқ менга катта ҳаётга йўлланма берган ва айни вақтдаги даражамга чиқишимда дебоча бўлган. Ўзбекистонда ҳозир ҳам ота-онам ва бир нечта дўстларим яшайди. Футболдаги дўстларим эса жуда кўп.
- Ота-онангиз ёнига тез-тез бориб турасизми?- Улар кўп келиб турадилар.
- Охирги марта Ўзбекистонда қачон бўлган эдингиз?- Охирги марта у ерга Ўзбекистон терма жамоасидаги хайрлашув учрашувимда иштирок этиш учун борган эдим. Ўшанда уч киши терма билан хайрлашганмиз ва ўртоқлик ўйинида майдонга тушганмиз. Бу тахминан 2009, 2010 ёки 2011 йилда бўлган (Максим Шацких, Виктор Карпенко ва Улуғбек Бақоевларнинг хайрлашув учрашуви Уммонга қарши 2014 йилнинг 29 май санасида бўлиб ўтган ва Ўзбекистон терма жамоаси 0:1 ҳисобида мағлубиятга учраган эди — Uff.uz изоҳи).
- Шунча вақт уйда бўлмадингизми?- Биринчидан, вақтим йўқ эди. Чунки мен ҳар доим бандман. Иккинчидан, ота-онам шундоқ ҳам гоҳ меникида, гоҳ эса акамникида бўлгач, қаерга ҳам борардим? Боз устига ҳозир самолётда тўғридан-тўғри рейсларни олиб ташлашди ва айланма йўллар билан учиб бориш керак. Ўзбекистонга бориш бироз ноқулай бўлиб қолди. Менимча, барибир шунга қарамай яқин вақтлар ичида уйга бориб келсам керак.
Изоҳ (0)