Ford йил охиригача Япония ва Индонезияда автомобиллари сотуви ҳамда импортини тўхтатади. Компаниянинг Осиё-Тинч океани бўлими раҳбари Дейв Шохнинг 25 январь, душанба куни ушбу мамлакатлардаги ваколатхоналар ходимларига йўллаган мактубида бу ҳақда маълум қилинган, дея хабар беради Motor.
Мактубда компания Ford маҳсулотларини бу давлатларда рентабелликка олиб келиши мумкин бўлган йўлни кўрмаётганлиги, маҳаллий офисларда ишлаётганлар энди компания ходимлари саналмаслиги билдирилган.
Компаниянинг Япониядаги ваколатхонаси 1974 йилда очилган. Ҳозирда унинг таркибида 292 киши бўлиб, мамлакат бўйича 52 та дилерлик маркази фаолият олиб бормоқда. Ford ўтган йили Японияда 5 мингга яқин Fiesta, Focus, Mustang, EcoSport, Kuga Explorer ва Lincoln автомобилларини сотган, бу Япония 2015 йилда импорт қилган барча янги машиналарнинг 1,5 фоизини ташкил этган.
Индонезиядаги офис 2002 йилдан бери ишлайди, 35 нафар ходими бор. 2015 йили 44 та дилерлик маркази орқали 6 минг атрофида Fiesta, Focus, EcoSport, Everest ва Ranger машиналари сотилган (Индонезия 2015 йилда импорт қилган жами автомобилларнинг 0,6 фоизи).
Ford 2016 йил охирига қадар Австралияда автомобиль ва двигателлар ишлаб чиқаришни тўхтатиши ҳам эълон қилинган. Компания бу давлатда 1925 йилдан бери автомобилларини йиғиб келарди.
Изоҳ (0)