Тошкентда фуқаронинг аризаси сабаб, автомобилни бошқариш вақтида қўл телефонидан фойдаланган милиция ходими жаримага тортилди. Бу ҳақда Facebook’даги «Водители Ташкента» гуруҳида фотохабар қолдирилган.
Фуқаро 2015 йил 22 сентябрь куни Тошкент шаҳар Ички ишлар бош бошқармаси бошлиғи номига Nexia русумли, давлат рақами 01 709 VSF бўлган хизмат автомобилини бошқариб кетаётган милиция ходими ҳаракат давомида қўл телефонидан фойдалангани юзасидан ариза ёзган.
Маълум бўлишича, Тошкент шаҳар ИИББ Патруль-пост хизмати ва жамоат тартибини сақлаш бошқармаси ходимлари томонидан, кўрсатилган автомобилни бошқарган ИИББ ППХБ ходимининг хатти-ҳаракатларига холисона баҳо бериш мақсадида, хизмат текшируви ўтказилган.
Текширув давомида фуқаро аризасида кўрсатилган важлар ўз тасдиғини топган, милиция ходими Маъмурий жавобгарлик тўғрисидаги кодекснинг 128-1-моддаси бўйича жаримага тортилиши тўғрисидаги ИИББ жавоб хати 2015 йил 10 октябрда фуқарога йўлланган.
2015 йил 24 октябрь санасида Тошкент шаҳар ИИББ Йўл ҳаракати хавфсизлиги бошқармаси ариза муаллифига йўл ҳаракати қоидаларини бузган милиция ходимидан 260 480 сўм миқдорида жарима ундирилгани ҳақида жавоб хати юборган.
Маълумот учун, Ўзбекистон Маъмурий жавобгарлик тўғрисидаги кодекси 128-1-моддасига кўра, транспорт воситасини бошқариш вақтида ҳайдовчиларнинг телефондан фойдаланиши энг кам иш ҳақи (ЭКИҲ)нинг икки баравари (25 январь ҳолатига кўра, 260 480 сўм) миқдорида жарима солинишига, худди шундай ҳуқуқбузарлик маъмурий жазо қўлланилганидан кейин бир йил давомида такрор содир этилган бўлса, ЭКИҲнинг уч баравари (390 720 сўм) миқдорида жарима солинишига ёки транспорт воситасини бошқариш ҳуқуқидан олти ой муддатга маҳрум этишга сабаб бўлади.
Изоҳ (0)