Ford yil oxirigacha Yaponiya va Indoneziyada avtomobillari sotuvi hamda importini to‘xtatadi. Kompaniyaning Osiyo-Tinch okeani bo‘limi rahbari Deyv Shoxning 25-yanvar, dushanba kuni ushbu mamlakatlardagi vakolatxonalar xodimlariga yo‘llagan maktubida bu haqda ma’lum qilingan, deya xabar beradi Motor.
Maktubda kompaniya Ford mahsulotlarini bu davlatlarda rentabellikka olib kelishi mumkin bo‘lgan yo‘lni ko‘rmayotganligi, mahalliy ofislarda ishlayotganlar endi kompaniya xodimlari sanalmasligi bildirilgan.
Kompaniyaning Yaponiyadagi vakolatxonasi 1974-yilda ochilgan. Hozirda uning tarkibida 292 kishi bo‘lib, mamlakat bo‘yicha 52 ta dilerlik markazi faoliyat olib bormoqda. Ford o‘tgan yili Yaponiyada 5 mingga yaqin Fiesta, Focus, Mustang, EcoSport, Kuga Explorer va Lincoln avtomobillarini sotgan, bu Yaponiya 2015-yilda import qilgan barcha yangi mashinalarning 1,5 foizini tashkil etgan.
Indoneziyadagi ofis 2002-yildan beri ishlaydi, 35 nafar xodimi bor. 2015-yili 44 ta dilerlik markazi orqali 6 ming atrofida Fiesta, Focus, EcoSport, Everest va Ranger mashinalari sotilgan (Indoneziya 2015-yilda import qilgan jami avtomobillarning 0,6 foizi).
Ford 2016-yil oxiriga qadar Avstraliyada avtomobil va dvigatellar ishlab chiqarishni to‘xtatishi ham e’lon qilingan. Kompaniya bu davlatda 1925-yildan beri avtomobillarini yig‘ib kelardi.
Izoh (0)