Россия мудофаа вазирлиги: Сурияда яна бир авиабаза ёки аэродромга эҳтиёж йўқ

Россия мудофаа вазирлиги Сурияда янги авиабазани ишга туширишни режалаштирмаган. Бу ҳақда вазирликнинг расмий вакили, генерал-майор Игорь Конашенков маълум қилди, дея хабар беради «ТАСС».

«Сурия ҳудудида янги авиабаза ёки Россия ҳарбий самолётлари учун қўшимча аэродром йўқ ва уларни қуриш ҳам режалаштирилмаган. The Times эълон қилган манбалар сохтакорлик ёки Туркия Сурия билан чегарада, ал-Қамишли ҳудудида қўшинларнинг йирик гуруҳини тўплаётганлигидан чалғитишга бўлган ўхшовсиз уринишдан бўлак нарса эмас. Биз аввал ҳам қайта-қайта Суриядаги авиагуруҳимиз самолётлари ушбу мамлакатнинг энг узоқ нуқтасидаги исталган масофага ярим соатда етиб боришини билдирганмиз», — дея таъкидлаган Конашенков.

Эслатиб ўтамиз, олдинроқ The Times Россия Сурияда иккинчи авиабазасини очиб, у ерга қўшинлар юборишга тайёрланаётганлиги ҳақида хабар берганди.