Ҳиндистон ва Россия бешинчи авлод қирувчи самолётларини яратиш лойиҳасига 4 млрд доллардан сармоя киритишга келишиб олди

Ҳиндистон ва Россия бешинчи авлод қирувчи самолётларини (FGFA) яратиш устида ишларни давом эттириш ва бу лойиҳага икки томон ҳам 4 миллиард доллардан сармоя киритиши хусусида келишиб олди. Бу ҳақда «ТАСС» хабар бермоқда.

«Ҳиндистон ва Россия вакиллари FGFA борасидаги ўзаро музокараларда келишувга эришди ва икки томоннинг лойиҳага қўшадиган улуши 4 миллиард долларгача камайди. Мазкур келишув Су-30 самолётларини алмаштириши лозим бўлган 250 та бешинчи авлод қирувчи самолётини қуришга имкон беради», — дея маълум қилган Ҳиндистон мудофаа вазирлигидаги манба.

2008 йилда ушбу лойиҳага икки томон киритадиган инвестиция 5,5 миллиард доллардан бўлиши белгиланган, инфляция ҳисобини олганда, ҳозирги кунга келиб бу сумма 6 миллиард долларни ташкил этарди. Бироқ, манбанинг таъкидлашича, Hindustan Aeronautics Ltd ва «Сухой» конструкторлик бюроси бирлашмаси лойиҳани 40 фоиз арзон нархда, 7 йил давомида амалга оширишга рози бўлган.