Қатарда давом этаётган 23 ёшгача бўлган футболчилар ўртасидаги Осиё чемпионатида барча ярим финал иштирокчилари маълум бўлди, деб хабар беради «Оламспорт».
22 январь куни Япония ва Қатар терма жамоалари чорак финал учрашувида мос равишда Эрон ҳамда КХДРни мағлуб этиб, ярим финалга йўл олганди.
Кеча, 23 январь оқшомида бу вазифани Ўзбекистон билан бир гуруҳдан жой олган Жанубий Корея ва Ироқ терма жамоалари ҳам уддалади.
Ироқ чорак финал баҳсида қўшимча бўлимларда БАА олимпиячиларини 3:1 ҳисобида таслим этди. Асосий вақтда томонлар муроса кўчасини танлади — 1:1.
Иккинчи чорак финал жуфтлигида эса Жанубий Корея терма жамоаси Иорданиядан 1:0 ҳисобида устун келди. Энди 26 январь куни ўтказиладиган ярим финалда Жанубий Корея Қатар билан, Япония эса Ироқ билан финал ҳамда Рио—2016 чиптаси учун майдонга тушади.
Чемпионатнинг энг кучли уч жамоаси Олимпиада йўлланмасига эга бўлади.
Эслатиб ўтамиз, Ўзбекистон олимпия терма жамоаси бош мураббийи Самвел Бабаян турнирдан олдин «Гуруҳимиздаги жамоалардан бири албатта Олимпиадага йўл олади», деганди. Ўзбекистон айнан Жанубий Корея ва Ироқдан учралган мағлубиятлар эвазига гуруҳда қолиб кетди.
Изоҳ (0)