Тошкент шаҳрида 1966 йили юз берган ва шаҳарнинг марказий қисмини вайрон қилган ерости силкинишларидан сўнг бир неча марта худди шундай кучдаги зилзила юз берган. Бу ҳақда, Ўзбекистон Фанлар академияси Сейсмология институти етакчи илмий мутахассиси Роман Ибрагимовга асосланиб, UZ24 хабар бермоқда.
Тошкент шаҳрида 1966 йил 26 апрель куни магнитудаси 5,2 га, интенсивлиги эса 8 баллга тенг зилзила юз берган, натижада 2 миллион квадрат метрдан ортиқ турар-жой, 8 киши ҳалок бўлган, 150 га яқин киши жароҳатланган, 300 минг киши бошпанасиз қолган.
Қайд этишларича, 1971 йили Товоқсойда, 1980 йили Назарбекда, 1987 йили Олтинтепада, шунингдек, 2008 ва 2010 йилларда бевосита Ташкент шаҳрининг ўзида интенсивлиги 1966 йилги зилзила билан тенг бўлган ерости силкинишлари қайд этилган.
«1966 йилги зилзила катта шов-шувга сабаб бўлиб, нафақат Ўзбекистонда, балки бутун собиқ Иттифоқда сейсмология соҳасининг ривожига туртки берган бўлса-да, сейсмологик жиҳатдан такрорланмас ҳодиса эмас. Бу каби зилзилалар мамлакатда ҳар икки-уч йилда бир бўлиб туради», — деди Сейсмология институти вакили.
Сейсмология институти лаборатория мудири, профессор Турдиали Ортиқовнинг сўзларига кўра, 1966 йилги зилзилада вайронагарчилик ва қурбонлар сони кўп бўлганига сабаб — шахсий турар-жой бинолари зилзилабардошли қилиб қурилмаганидир.
«1966 йилги зилзиладан аввал Марказий универмаг, «Тошкент» меҳмонхонаси ва бошқа йирик бинолар қурилган бўлиб, уларда зилзилабардошлик ҳисобга олинган. Улар зилзилага бардош бера олган ва ҳозир ҳам мустаҳкам турибди. 1966 йили асосан хусусий уй-жойлар вайрон бўлган. Шундан сўнг бизда турар-жой бинолари қурилишига жиддий эътибор қаратила бошланди», — деди профессор.
Изоҳ (0)