Германиянинг Ўзбекистондаги элчиси Найтҳарт Ҳёфер-Виссинг 18 январь куни «Ҳилол-нашр» матбаа-нашриётида меҳмон бўлиб, марҳум шайх Муҳаммад Содиқ Муҳаммад Юсуфнинг ўғли Исмоил Муҳаммад Содиқ билан учрашди. Бу ҳақда «Info.islom.uz» хабар бермоқда.
Хабар беришларича, элчи Ҳёфер-Виссинг 2015 йил март ойида шайх Муҳаммад Содиқ Муҳаммад Юсуфнинг вафот этгани муносабати билан Исмоил Муҳаммад Содиққа яна бир бор таъзия изҳор қилиб, 2016 йилнинг хурсандчилик ва яхшиликлар йили бўлишини тилаган.
Суҳбат давомида Германия элчиси жаҳонни ташвишга солиб турган терроризм муаммоси, шунингдек, Европадаги, хусусан Германиядаги қочоқлар масаласи ҳақида тўхталиб ўтган ва Ислом дини мазкур муаммоларни қандай муолажа қилиши мумкинлиги борасида Исмоил Муҳаммад Содиққа саволлар билан мурожаат қилган. «Элчи жаноблари саволларга берилган жавоблардан мамнун бўлди», — дейилади «Info.islom.uz» хабарида.
«Исмоил Муҳаммад Содиқ меҳмонга шайх Муҳаммад Содиқ Муҳаммад Юсуф ҳазратларининг мазкур муаммога бевосита тегишли бўлган «Очиқ хат» китобининг рус тилидаги нусхасини совға қилиб, ташриф учун миннатдорчилик билдирди», — дейилади хабарда.
Маълумот учун, шайх Муҳаммад Содиқ Муҳаммад Юсуф ўлимидан роппа-роса бир ой аввал Германиянинг Ўзбекистондаги элчиси Найтҳарт Ҳёфер-Виссинг билан учрашган эди.
Ўшанда шайх элчига «Ҳилол-нашр»да чоп этилган китоблардан бир қанчасини ҳадя қилиш ниятини билдирганида, Ҳёфер-Виссинг бу китобларни сотиб олишини айтиб, рус тилида чоп этилган бир қанча китобларни сотиб олган ва, агар маъқул топилса, баъзи китобларни немис тилига таржима қилишни ҳам ўйлаб кўришни таъкидлаган эди.
Изоҳ (0)