Баҳайбат панда боласи Бэй Бэй биринчи марта Вашингтон ҳайвонот боғи ташрифчилари олдига чиқди

АҚШ пойтахтидаги Миллий ҳайвонот боғи ташрифчилари 16 январь, шанба куни баҳайбат панда боласи Бэй Бэйни биринчи марта кўришга муваффақ бўлди. Ўтган йилнинг август ойида дунёга келган пандани кўриш учун эрталабдан юзлаб болалар ва катталар йиғилди, деб хабар қилади «ТАСС».

Мутахассисларнинг сўзларига кўра, 5 ойлик панда боласи ўзини жуда яхши ҳис қилмоқда ва ҳозирда унинг оғирлиги 12 килограммни ташкил этмоқда. Унга исмни ўтган йилнинг сентябрида АҚШ ва Хитойнинг биринчи хонимлари — Мишель Обама ва Пэн Лиюань қўйган. Бэй Бэй хитойчадан таржима қилинганда «хазина», «қимматбаҳо» маъноларини беради.

Ҳайвонот боғининг расмий вакили Девин Мёрфи икки йил олдин Бэй Бэйнинг опаси Бао Бао биринчи марта одамлар олдига чиққанда, уни кўргани бир кунда 5,5 минг киши келганини айтиб ўтди.

Қўшма Штатлар Бэй Бэйнинг ота-онаси Тян Тян ва Мэй Сянни 2000 йилда Хитойдан ижарага олган. Жорий йилда улар 18 ва 17 ёшга тўлади. Вашингтондаги Миллий ҳайвонот боғи уларнинг ижараси учун ҳар йили Хитойга 500 минг доллардан тўлайди. Келишувга кўра, Бэй БЭй ва Бао Бао тўрт ёшга тўлганида Хитойга қайтади. Уларнинг ота-онаси эса 2020 йил охиригача АҚШда қолади.