Режиссёр Рустам Саъдиев «Ўзбеккино» Миллий агентлиги буюртмасига асосан «Барон» номли фильм суратга олди. Алишер Навоий номли киносаройида 15 январь куни бўлиб ўтган фильмнинг ёпиқ премьераси гулдурос қарсаклар билан кутиб олинди.
«Барон»нинг актёрлар жамоасига назар солиб, ҳар қандай режиссёрнинг ҳаваси келиши аниқ. Ўзбекистонликлардан Жавоҳир Зокиров, Улуғбек Қодиров, Жамила Ғофурова, Дилором Эгамбердиева, Раъно Шодиева, Дилноза Кубаева, Шаҳзода Матчонова, Ёқуб Аҳмедов, россияликлардан Андрей Смоляков (Россия халқ артисти), Виктор Вержбицкий (Россия халқ артисти ва Ўзбекистонда хизмат кўрсатган артист), Фарҳод Маҳмудов (Россияда хизмат кўрсатган артист) каби ўз ишининг усталари ва ҳатто Голливуддан актёрлар бор (асли суриялик Ҳасан Масъуд). Ридли Скоттнинг «Муқаддас замин» фильмида султон Салоҳиддин Аюбий образини жонлантирган Ҳасан Масъуд, Рустам Саъдиевнинг кинолойиҳасида тожикистонлик ўзбек наркобарони Мардонбойнинг жиддий ҳамкори — Истанбулдаги яхтада яшайдиган Сулаймонийга айланди.
Фильм ибтидосида кўзларимизни қувонтирадиган актриса Жамила Ғофурова латофатли ва айни вақтда жуда ёвуз аёл образини аъло даражада кўрсатиб берган, дейиш мумкин. Умуман, (қарийб) малласоч Рўзигулни у шу вақтгача ижро этган салбий қаҳрамонлари орасида ўзига хос чўққи, дейиш ҳам мумкин. Ҳуқуқни муҳофаза қилувчи органларнинг газеталарида бир неча ҳафта давомида бериб бориладиган криминал янгиликлардаги тўғри йўлдан адашган ўнлаб аёлларнинг барча қилмишларини Жамила Ғофурованинг бир қаҳрамони бир фильмда, бир ўзи, то уни отиб ўлдирмагунларича, амалга оширишга улгуради — гиёҳванд моддалар сотади, ўзини ҳам сотади, одам савдоси билан шуғулланади, ўз опаси (актриса Раъно Шодиева)ни ўлдиришга уринади ва ҳоказо.
Рустам Саъдиевнинг аввалги фильми — «Сотқин»да Андижондаги безорилар ва террорчиларнинг бошлиғи сифатида гавдаланган Жавоҳир Зокиров бу сафар айнан шундай қонунбузарларга қарши курашувчи, Ички ишлар вазирлигининг-да юқори мартабали мулозимлари: «Саломатлик тилайман!», — деб кутиб оладиган махсус хизмат ходими сифатида қаршингизда намоён бўлади. У — суперагент. Бир қарасанг, Сурхондарёда киракашлик қилади, бошқа сафар эса «свечалари»нинг яроқсизлиги сабаб «эски ‘Жигули’си» йўл ўртасида тўхтаб қолади. Фильм интиҳоси яқинлашавергани сари, Рустам Саъдиев сизга шундай бир саҳнани туҳфа этадики, ундаги Жавоҳир Зокировни кўриб, Америка блокбастерларидаги Ерни қутқариш масаласи ҳал бўладиган сийқаси чиққан лаҳзалар ёдингизга тушса-да, беихтиёр қарсак чаласиз.
Бироқ, энг асосий суперагент Жавоҳир Зокиров эмас. Йўқ, Жавоҳир Зокиров бор-йўғи унинг бошлиғи. Суперагентнинг кимлигини орада бирров кўринган Дилноза Кубаеванинг қаҳрамони «фош этишга» уринади, ўша кадрларни кўрганингиздаёқ, юрагингиз бир жиз этади: «Бу ерда бир гап бор!», — деб. Фильм маъно-мазмуни бошидан маълум — наркотиклар ёмон, уларни сотиш ундан-да ёмон, йўқолсин оғуфурушлар! «Келгинди фильм»ларидан бир калла юқори сакрашга эришган режиссёр Рустам Саъдиев, бутун фильм давомида гўё иккинчи планда юргандек кўринган бир қаҳрамонни сўнгги лаҳзаларда машъаладек олиб чиқиб, томошабинни ҳайрон қолдириш йўлини топа олган.
«Барон» — юксак бадиий асар эмас (бундан бир неча йил аввал «Оскар»ни қўлга киритган «‘Арго’ операцияси»да ҳам юксаклик йўқ, масалан), керак бўлмаган ўринларда жавобсиз қолган саволларни туғдиради (укасини Ўзбекистон қамоғидан озод қилиш учун ҳар нарсага тайёр наркобарон, бирдан жаҳон миқёсида наркобизнесменга айлангиси келиб қолади); муаллифлик фильмларига мўлжалланган халқаро кинофестивалларда ғолиблик учун курашмайди, албатта; лекин олдига қўйилган икки асосий вазифадан камида бирини (бири ҳақида юқорида айтдик — наркотиклар ёмон!) яхши уддалаган: Ўзбекистон энг яхши мамлакат — унинг Миллий хавфсизлик хизмати Россия Федерал хавфсизлик хизматини-да огоҳлантирмасдан, ўзича ҳаракатлар қилади, унинг қамоқхоналаридаги маъмурларни Тожикистондаги каби сотиб олиб бўлмайди, бунга ҳатто Қозоғистондаги энг зўр «қонундаги ўғрилар» ҳам аралаша олмайди. Ва бу ҳали ҳаммаси эмас.
«Дарё» экшн-саҳналари билан оммавий кинога қизиқувчи томошабинларни, касса йиғимлари билан эса «Ўзбеккино»ни хурсанд қила оладиган бу фильмни ҳеч бўлмаса бир марта томоша қилишни тавсия этади.
Изоҳ (0)