Леонардо Ди Каприо олтинчи марта «Оскар»га номзод бўлди

Американинг Лос-Анжелес шаҳрида «Оскар» мукофотига номзодлар эълон қилинди. Бу ҳақда «Оскар»нинг расмий сайти хабар бермоқда.

Номзодларни эълон қилиш маросимини режиссёрлар Гильермо дель Торо ва Энг Ли, актёр Жон Красински ва Америка киноакадемияси президенти Шерил Бун Айзекс олиб борди.

Энг яхши актёр мукофоти учун Леонардо Ди Каприо («Ўлимдан қайтган»), Брайан Крэнстон («Трамбо»), Мэтт Деймон («Марслик»), Майкл Фассбендер («Стив Жобс») ва Эдди Редмэйн («Даниялик қиз») кураш олиб боради. Ди Каприо илгари беш марта (4 марта «Энг яхши актёр» ва 1 марта «Энг яхши продюсер» номинациясида) «Оскар»га номздор бўлган. Аммо бирон марта ҳам мукофотни қўлга кирита олмаган.

Кэйт Бланшетт («Кэрол»), Бри Ларсон («Хона»), Женнифер Лоуренс («Жой»), Шарлотта Рэмплинг («45 ёш») ва Сирша Ронан («Бруклин») энг яхши актриса мукофоти учун курашади.

Энг яхши режиссёр мукофотига Томас Маккарти («Диққат марказида»), Адам Маккей («Пасайиш ўйини»), Жорж Миллер («Телба Макс: Ғазаб йўли»), Алехандро Гонсалес Иньярриту («Ўлимдан қайтган») ва Леонард Абрахамсон («Хона») даъвогарлик қилмоқда.

Энг яхши фильм бўлишга номзодлар қаторига «Пасайиш ўйини», «Айғоқчи кўприги», «Телба Макс: Ғазаб йўли», «Марслик», Ўлимдан қайтган», «Хона» ва «Диққат марказида» киритилди.

Ғолиблар номи 28 февраль куни маълум бўлади.