Ўзбекистонлик ФИФА рефериси Равшан Эрматов футбол бўйича олимпия терма жамоалари ўртасидаги Осиё чемпионати арафасида Ўзбекистон термаси имкониятлари ҳақида фикр билдирди. Бу ҳақда RedPen хабар бермоқда.
12 январь куни Қатарда U-23 Осиё чемпионати старт олади. Ўзбекистон олимпия терма жамоаси мазкур мусобақада Жанубий Корея, Ироқ ва Яман термалари билан бир гуруҳдан ўрин олган. Самвел Бабаян шогирдлари турнирдаги биринчи учрашувни 13 январь куни Жанубий Кореяга қарши ўтказади.
«Футболда ҳар доим ҳам энг кучли ёки энг тажрибали жамоа ғалаба қозонавермайди. Тартиб-интизом ва жонкуярлик футболда жуда катта аҳамиятга эга. Агар ҳар бир вазиятда 100 фоиз куч билан ҳаракат қилсангиз, майдоннинг ҳар бир қаричи учун кураш олиб борсангиз, шубҳасиз, сизда муваффақият учун имконият бўлади», — деди Эрматов.
«Футболчиларимизнинг кўзларида олов бор. Улар бундай имконият камдан-кам бўлишини ҳис қилиб турибди, чунки Олимпиада йўлланмасини ҳеч ким осонликча бериб қўймайди. Ишонаманки, улар ҳар қандай жамоани мағлуб эта олишади», — деди таниқли ҳакам.
Равшан Эрматов, шунингдек, футбол бўйича Ўзбекистон миллий терма жамоасига ҳам ишонишини таъкидлаб ўтди. «Ўзбекистон миллий терма жамоаси Россияда бўлиб ўтадиган 2018 йилги жаҳон чемпионати йўлланмасини қўлга киритишига ишонаман», — дея қўшимча қилди ФИФА рефериси Равшан Эрматов.
Изоҳ (0)