Ўзбекистоннинг биринчи рақамли теннисчиси Денис Истомин Австралиянинг Сидней шаҳрида старт олган турнирдаги иштирокини омадсиз бошлади, деб хабар қилади «Оламспорт».
Мусобақанинг мукофот жамғармаси 461 минг 330 долларни ташкил қилади.
Қуръа натижасига кўра Истомин бугун, 11 январь куни яккалик баҳсларининг илк даврасида Андреас Сеппига қарши кортга чиқди. Турнирда бешинчи рақам остида таснифланган италиялик ракетка устасига қарши баҳсда Истомин 4:6, 6:4, 2:6 ҳисобида имкониятни бой бериб қўйди. Энди Денис бор эътиборини жуфтликдаги иштирокига қаратади.
Эслатиб ўтамиз, Денис Истомин ўтган ҳафта Брисбен шаҳридаги ўзи учун мавсумнинг илк турнири биринчи босқичида қозоғистонлик Михаил Кукушкинга имкониятни бой бериб қўйганди.
Маълумот учун айтиш жоиз, Истомин келаси ҳафта йилнинг дастлабки «Катта Дубулға» туркумига кирувчи турнири Австралия Очиқ чемпионатида иштирок этади.
Изоҳ (0)