2016 йилнинг 12 январида бошланадиган 23 ёшгача бўлган футболчилар ўртасидаги Осиё чемпионати олдидан Ўзбекистон футбол федерацияси матбуот хизмати Ўзбекистон олимпия терма жамоаси бош мураббийи Самвел Бабаян билан суҳбат уюштирди.
Интервью давомида мураббий бўлажак мусобақа, Ўзбекистон ўрин олган гуруҳ, рақиблар ва Қатардаги об-ҳаво шароити борасида тўхталиб ўтди.
«Бу турнир бутун Осиё футболи учун кашфиётлар турнири бўлади. Чунки яқин келажакда қитъа футболини мана шу чемпионат иштирокчилари жаҳонга танитади.
Гуруҳимиз — мусобақадаги энг кучлиси. Бу гуруҳдан қайсидир жамоа албатта Риодаги Олимпиадага йўл олади. Ҳа, қуръа бизга энг кучли рақибларни тақдим этди. Кучли жамоалар фонида биз ўз кучимизга тўғри баҳо бериш имконига эга бўламиз.
Ҳозирги кунга келиб барча чизиқлар ўртасидаги ҳамоҳангликка ва мувозанатга эришдик, деб ўйлайман. Тайёргарликка келадиган бўлсак, менимча, мураббий ўз фалсафасини футболчиларга тушунтириш ва уни майдонда татбиқ қилиши учун бир ой муддат етарли. Нима бўлганда ҳам, қанчалик тайёр эканингни биринчи расмий ўйин кўрсатиб беради. Ўтказган ўртоқлик назорат учрашувларимиз бизга жамоанинг кучли ва ожиз нуқталарини аниқлашда катта ёрдам берди. Бироқ расмий ўйин бу, барибир, расмий ўйин.
Айни пайтда Қатардаги об-ҳаво футбол учун идеал, деб ўйлайман. Бундай қулай об-ҳаво шароитида ажойиб, замонавий, динамик футбол намойиш қилиш мумкин», — деди Бабаян.
Эслатиб ўтамиз, Ўзбекистон Осиё чемпионатида Жанубий Корея, Ироқ ва Яман билан бир гуруҳдан ўрин олган. Самвел Бабаян шогирдлари турнирдаги иштирокини 13 январь куни корейсларга қарши ўйин билан бошлайди.
Изоҳ (0)