Тошкент шаҳрида истиқомат қилувчи уч йигит — абитуриент, талаба ва олий таълим муассасаси битирувчиси қизиқарли йўналишда тадбиркорлик фаолиятини йўлга қўйди. Йигитлар офис дастурлари тўпламига кирувчи Word, Excel ҳамда PowerPoint дастурлари учун тўлиқ ўзбек тилидаги видеодарсликларни тайёрлаб, сотувга чиқарди.
Жаҳон иқтисодиёти ва дипломатия университетининг 21 ёшли талабаси Б.Муҳиддинов ҳамда ака-ука Қодировлар (А.Қодиров, 23 ёш, Тошкент молия институти битирувчисчи; Ш.Қодиров, 20 ёш, абитуриент) биргаликда тайёрлаган ўз видеомаҳсулотларини «ўзбек тилидаги биринчи тўлақонли видеодарсликлар» деб ҳисоблайди.
«Бундай деб аташга асосимиз бор. Чунки айнан ўзбек тилида аввал ишлаб чиқарилган бу турдаги маҳсулотларнинг ҳеч бири Word, Excel, PowerPoint каби дастурларда тўлиқ ишлашни ўргатмайди», — дея таъкидлайди Б.Муҳиддинов.
Ёш тадбиркорлар ўз видеодарсликлари ва видеокурсларини тарқатиш ва сотиш учун махсус — videokent.uz сайтини ишга туширган. Сайтда қайд этилишича, «асосий маҳсулотларнинг барчаси бепул ҳамда очиқ тарқатилишига қарамай (бепул дарсликлар билан, масалан, Mover’да танишиш мумкин), айнан ишлаб чиқариш жараёни кўп вақт ҳамда меҳнат талаб қиладиган, маълум маҳоратни чуқур ўрганишга бағишланган видеокурслар белгиланган нархларда сотилади».
«Ҳозирда сайтимизда 24 та (171 соат) тўлиқ видеодарслик, 50 дан (241 дақиқа) ортиқ бепул видеодарслар мавжуд. Видеодарсларимиз фойдаланувчиларда катта таассурот қолдирди, «Зиёнет», Utube.uz, Mover каби портал ва видеосервисларда минглаб маротаба томоша қилинди», — дейди Б.Муҳиддинов.
Видеодарслар ҳам, видеокурслар ҳам бир неча туркумга бўлинган («Офис дастурларида ишлаш», «Компьютерда ишлаш», «Интернет билан ишлаш», «Инглиз тилини ўрганиш» каби). Видеодарсларда алоҳида ҳолатлар бир дарс сифатида ўтилса, маълум дастурни тўлақонли ўрганишга бағишланган видеокурслар яна алоҳида даражаларга ажратилган: «Ўқитувчилар учун Word», «Талабалар учун PowerPoint», «Ҳисобчилар учун Excel» каби.
«Энг асосий мақсадимиз — одамлар ҳаётини, уларнинг яшаш, ўқиш ва ишлаш тарзини замонавий технологиялар, юқори даражадаги билим, маҳорат, тажриба, сифатли маҳсулотларимиз ҳамда профессионал хизматларимиз орқали янада осонлаштириш, янада юксалтириш ва янги даража олиб чиқишдир», — дейилади Videokent лойиҳаси сайтидаги мурожаатда.
Изоҳ (0)