2015 йил 14—22 декабрь кунлари «Ўзбектелеком» АК Наманган филиали Уйчи телекоммуникация боғламасида Алоқа, ахборотлаштириш ва телекоммуникация технологиялари соҳасида назорат бўйича давлат инспекциясининг Наманган вилояти ҳудудий бўлинмаси томонидан ўрганиш ўтказилди. Бу ҳақда Инспекция матбуот хизмати хабар бермоқда.
Ўрганиш Алоқа, ахборотлаштириш ва телекоммуникация технологиялари соҳасида назорат бўйича давлат инспекцияси ҳамда «Ўзбектелеком» акциядорлик компанияси ўртасида телекоммуникация соҳасида ҳамкорликда ишлаш бўйича 2014 йилда имзоланган ўзаро Келишув ҳамда Инспекциянинг Наманган вилояти ҳудудий бўлинмасининг 2015 йилги иш режасига асосан ўтказилди.
Ўрганиш давомида телекоммуникация тармоғини ривожлантириш, самарадорлигини ошириш, хизмат кўрсатиш сифатини яхшилаш ва истеъмолчилар ҳуқуқларини ҳимоя қилиш юзасидан амалдаги қонун ва норматив ҳужжатлар талабларининг бажарилиши кўриб чиқилди ва бир қатор камчиликлар аниқланди.
Ўрганиш натижалари «Ўзбектелеком» АК Наманган филиали бошқарув аппарати ходимлари ҳамда Уйчи телекоммуникация боғламаси ходимлари билан биргаликда муҳокама қилинди. Камчиликларни бартараф этиш бўйича чора-тадбирлар режаси ишлаб чиқилиб, бажарилиши Инспекциянинг Наманган вилояти ҳудудий бўлинмаси томонидан назоратга олинди.
Изоҳ (0)