Ўзбекистон президенти Ислом Каримов 10 декабрь кунги фармойиши (pdf) билан «Соғлом она ва бола йили» Давлат дастури лойиҳасини ишлаб чиқишда алоҳида эътибор қаратилиши зарур бўлган устувор вазифаларни белгилади, дея хабар бермоқда «Газета.uz».
Энг асосий вазифалардан бири сифатида оилани, оналик ва болаликни муҳофаза қилиш, аёллар манфаатларини ҳимоя қилиш, соғлом болани тарбиялашда уларнинг ролини ошириш, кучли бақрқарор ва равнақ топаётган давлатнинг негизи сифатида оила институтини мустаҳкамлашга йўналтирилган қонунчилик ва норматив-ҳуқуқий базани янада такомиллаштириш қайд этилди.
Шунингдек, олис ва чекка қишлоқ туманларида яшаётган аҳоли, айниқса, аёллар учун зарур ижтимоий, маиший ва тиббий нуқтаи назардан зарур шароитлар яратиш, қишлоқ жойларда намунавий лойиҳалар асосидаги замонавий уй-жойлар, ижтимоий инфратузилма объектларини барпо этиш, қишлоқ аҳолисини тоза ичимлик сув, табиий газ билан таъминлаш, хизматлар кўрсатиш ва сервис даражасини юксалтириш борасидаги ишларни изчил давом эттириш белгиланди.
Тиббиёт муассасаларининг, жумладан, перинатал ва скрининг марказларининг моддий-техник базасини ва кадрлар салоҳиятини янада мустаҳкамлаш, оилавий поликлиникалар ва қишлоқ врачлик пунктларининг иш самарадорлигини ошириш, патронаж тиббиёт ҳамшираларининг сонини кўпайтиришни таъминлаш, акушер-гинекологлар ва болалар шифокорлари малакасини ошириш ва бошқа қатор вазифалар тайинланди.
Фармойишнинг ижросини назорат қилиш бош вазир Ш. Мирзиёев зиммасига юкланди.
Изоҳ (0)