Асли ўзбекистонлик заргар ҳақида дунёга машҳур рэперлар қўшиқ куйлади (фото)

Jacob & Co. заргарлик бренди асосчиси Жейкоб Арабо 1965 йилда Тошкентда туғилган, деб ёзади My Day.

У 14 ёшлигида Яков Арабов оиласи Ўзбекистонни тарк этиб, АҚШга кўчиб боради. Жейкоб у ерда заргарлик мактабида ўқийди, сўнг заргарлик фабрикасига ишга киради.

Ўзининг Jacob & Co. маркасини Арабо 1986 йилда яратади. Ўша йили Нью-Йоркнинг қоқ маркази, Манхеттенда биринчи дўкони очилади.  Унинг ўзига хос заргарлик буюмлари ва қўл соатлари хип-хоп ижрочилар орасида жуда машҳур бўлиб кетди.

Америкада Жейкобни «юлдузлар заргари» ва «реп ва хип-хоп ижрочиларининг сарой устаси» деб атай бошлашди.

«Мусиқачилар шундай кишиларки, сиз уларга ёқсангиз, улар сиз ҳақингизда ўз танишларига гапириб беришни, сиз ҳақингизда қўшиқлар куйлашни бошлайди. Бугунги кунда мен 50 дан ортиқ қўшиқнинг персонажига айланганман», — деган эди заргарнинг ўзи.

Қўшиқларда у кўпинча Jacob ёки the Jeweler сифатида тилга олинади.

Хусусан, Бейонсе, Каньи Уэст, Жей Зи, 50 Cent, Эминем, Келиснинг қўшиқларида Жейкоб эслаб ўтилган.

Нафақат рэперлар, балки Элтон Жон, Женнифер Лопес, Наоми Кемпбелл, Майкл Жордан, Энрике Иглесиас, Памела Андерсон, Карл Лагерфельд, Кира Найтли ва бошқа таниқли кишилар ҳам асли ўзбекистонлик заргарнинг мижозларидир.